Publish Date: Wed, 03 Dec 2025 (14:00 IST)
Updated Date: Wed, 03 Dec 2025 (14:08 IST)
फुलहॅमच्या जोरदार पुनरागमनानंतरही मँचेस्टर सिटीने 5-4 असा विजय मिळवत एर्लिंग हालांडने इंग्लिश प्रीमियर लीग (ईपीएल) फुटबॉल स्पर्धेत सर्वात कमी सामन्यात 100 गोल करण्याचा नवा विक्रम प्रस्थापित केला. हालांडने खेळाच्या17 व्या मिनिटाला त्याच्या संघाचा पहिला गोल करून त्याचे गोल शतक पूर्ण केले.
प्रीमियर लीगमधील हा त्याचा 111 वा सामना होता आणि अशा प्रकारे तो या स्पर्धेत सर्वात कमी सामन्यात 100 गोल करणारा खेळाडू बनला. त्याने 124सामन्यांमध्ये ही कामगिरी करणाऱ्या इंग्लंडच्या दिग्गज खेळाडू अॅलन शिअररचा विक्रम मोडला.
एकेकाळी मँचेस्टर सिटी 5-1 अशी आघाडीवर होती, पण फुलहॅमने उल्लेखनीय पुनरागमन केले. इंज्युरी टाइममध्ये ते बरोबरीच्या जवळ पोहोचले होते, परंतु जोश किंगचा प्रयत्न निष्प्रभ ठरला.
हालांडने मँचेस्टर सिटीच्या कामगिरीबद्दल निराशा व्यक्त केली आणि स्काय स्पोर्ट्सला सांगितले की, "या प्रकारची कामगिरी चांगली नाही आणि आपल्या सर्वांना ते माहित आहे आणि आपल्याला एक संघ म्हणून सुधारणा करण्याची आवश्यकता आहे." तथापि, त्याने त्याच्या विक्रमाबद्दल पुढे म्हटले की, "हा एक अभिमानाचा क्षण आहे. 100 गोलच्या क्लबमध्ये सामील होणे ही एक मोठी गोष्ट आहे. इतक्या कमी वेळात ते साध्य करणे अविश्वसनीय आहे. मला अभिमान आहे, मी आनंदी आहे."
प्रीमियर लीगमधील दुसऱ्या एका सामन्यात न्यूकॅसल युनायटेड आणि टोटेनहॅम हॉटस्परने 2-2 असा रोमांचक सामना खेळला. न्यूकॅसलने बहुतेक वेळेस सामन्यावर नियंत्रण ठेवले आणि 71व्या मिनिटाला ब्रुनो गुइमारेसने आघाडी घेतली. 86 व्या मिनिटाला अँथनी गॉर्डनने पेनल्टीवर गोल करून न्यूकॅसलला 2-1 अशी आघाडी मिळवून दिली.
टोटेनहॅमसाठी क्रिस्टियन रोमेरोने उत्कृष्ट कामगिरी करत दोन्ही गोल केले. प्रथम, त्याने डायव्हिंग हेडरने बरोबरी साधली आणि नंतर इंज्युरी टाइममध्ये एक जबरदस्त सायकल किक मारून गुण मिळवला. न्यूकॅसलने सामन्यावर मजबूत पकड राखल्यानंतर रोमेरोच्या गोलमुळे टॉटेनहॅमला पुन्हा खेळात येण्याची संधी मिळाली. टॉटेनहॅम आता 19 गुणांसह टेबलमध्ये 11 व्या स्थानावर आहे, तर न्यूकॅसल, ज्याचेही 19 गुण आहेत, ते13 व्या स्थानावर आहे, परंतु गोल फरकामुळे अजूनही खाली आहे.