प्रीती पवारने आशियाई बॉक्सिंगमध्ये ऑलिम्पिक कांस्यपदक विजेत्या इमला पराभूत केले

उदयोन्मुख भारतीय बॉक्सर प्रीती पवारने पॅरिस ऑलिम्पिक कांस्यपदक विजेत्या कोरियाच्या अजी इमला पराभूत करून आशियाई बॉक्सिंग चॅम्पियनशिपच्या अंतिम फेरीत प्रवेश केला. निकहत झरीन आणि लव्हलिना बोरगोहेन आपापल्या लढती हरल्याने भारताला मोठा धक्का बसला. प्रिया आणि अरुंधती चौधरी यांनीही उपांत्य फेरीतील लढती जिंकल्या. विश्व चॅम्पियनशिप पदक विजेत्या पूजा राणी आणि अंकुशिता बोरो यांना उपांत्य फेरीत पराभूत झाल्याने कांस्यपदकावर समाधान मानावे लागले.

आशियाई क्रीडा स्पर्धेतील कांस्यपदक विजेत्या प्रीतीने तीन फेऱ्यांच्या सामन्यात इमला ५-० ने पराभूत केले. आता अंतिम फेरीत तिचा सामना चायनीज तैपेईच्या, तीन वेळच्या विश्वविजेत्या (२०१९, २०२३, २०२५) आणि टोकियो ऑलिम्पिक २०२० कांस्यपदक विजेत्या हुआंग शाओ वेनशी होईल. महिलांच्या ६० किलो वजनी गटात, प्रियाने स्थानिक बॉक्सर नामून मोनखोरला ५-० ने पराभूत करून अंतिम फेरीत प्रवेश केला आहे. आता तिचा सामना उत्तर कोरियाच्या उन जोंग वॉनशी होईल.

अरुंधतीने ७० किलो वजनी गटाच्या उपांत्य फेरीत उझबेकिस्तानच्या ओइशा तोइरोवाला ४-१ ने पराभूत केले. आता तिचा सामना कझाकस्तानच्या बेकिट सेयिडिशशी होईल. दोन वेळची विश्वविजेती निखत ५१ किलो वजनी गटाच्या उपांत्य फेरीत चीनच्या ऑलिम्पिक पदक विजेत्या वू युएकडून ५-० ने पराभूत झाली.

या बॉक्सरविरुद्ध निखतचा हा दुसरा पराभव आहे. टोकियो ऑलिम्पिक कांस्यपदक विजेती लव्हलिना ७५ किलो वजनी गटात उझबेकिस्तानच्या विश्व चॅम्पियनशिप कांस्यपदक विजेत्या अझीझा झोकिरोवाकडून ५-० ने पराभूत झाली. पहिल्या फेरीत बाय मिळाल्यानंतर स्पर्धेतील लव्हलिनाचा हा पहिलाच सामना होता. अंकुशिता चायनीज तैपेईच्या निएन चिन चेनकडून ३-० ने पराभूत झाली. महिलांच्या ८० किलो वजनी गटात पूजा उपांत्य फेरीत कझाकस्तानच्या एन. रायबेट्सकडून पराभूत झाली.

Edited By - Priya Dixit