फरहान अख्तर

तरूणाईचे भावविश्व रेखाटणारा दिग्दर्शक

जन्म- 9 जानेवारी, 1974, मुंबई.

सुप्रसिद्ध पटकथालेखक, गीतकार जावेद अख्तर यांचा सुपुत्र अशी फरहान अख्तर याची ओळख करून देणे म्हणजे त्याच्या कर्तृत्वाकडे डोळेझाक करण्यासारखे आहे. दिल चाहता है या पहिल्याच चित्रपटाने त्याने आपल्या आगमनाची द्वाही फिरवली. २001 मध्ये हा चित्रपट आला नि अवघ्या तरूणाईला वेड लावले.

त्यातील गाणी, तरूणांची जगण्याची पद्धत, त्यांच्या फॅशन यांचे मोठ्या प्रमाणात अनुकरण झाले. आणि फरहान अख्तरचे नाव देशभरातील तरूणाईला तोंडपाठ झाले. मुक्त अर्थव्यवस्थेनंतर आर्थिक, सामाजिक, शैक्षणिक सर्वच क्षेत्रात झपाट्याने बदल झाले. तरूणांना सेवा क्षेत्रात मोठ्या पगाराच्या नोकऱ्या मिळू लागल्या.

नवीन मॉल, ब्रॅडेड कपड्यांच्या शोरूम, मल्टीप्लेक्स, हॉटेल्स, पाश्चात्य संगीत हे सर्व तरूण पिढीने सहजतेने स्वीकारले. त्यांची जीवनशैलीच बदलून गेली. लेट नाइट पार्टीज, आऊटींग, डेटिंग, अफेअर्स तरूणांच्या संस्कृतीचा भाग बनून गेले. मोबाईल, लॅपटॉप या बाबी आवश्यक या सदरात मोडू लागल्या.

सत्तरीतला बावळटपणा भिरकावून देत ते जागतिकीकरणाच्या लाटेवर स्वार होऊन जग जिंकायला निघाले. वेग व वेळेला त्यांच्या जीवनात अनन्यसाधारण महत्व आले. तरूणांची मानसिकता, त्यांच्या अंतर्मनात चालणारी वादळे, आधुनिकतेच्या रेट्यात होणारी संस्कृतीची गोची, त्यातून होणारी घुसमट, या सगळ्यांमुळे निर्माण झालेली जनरेशन गॅप. हे सगळं टिपून ते फरहानने दिल चाहता है मध्ये दाखवलं.

तोपर्यंतचे चित्रपट केवळ वरवरचा बदल दाखवत होते. फरहानने याच्या आत घुसून ते विश्व लोकांपुढे आणले. चाळीशीतील विधवेच्या प्रेमात पडणारा तरूण ही एरवी अशक्यप्राय वाटणारी कल्पना त्याने त्यात दाखवली. विशेष म्हणजे ती पाहणाऱ्यांनाही खटकली नाही. अन्यथा चित्रपट एवढा चाललाच नसता.

पहिलाच चित्रपट असूनही फरहानने दाखवलेली समज त्याच्यातील विचारी दिग्दर्शकाची ओळख करून देणारी आहे. त्याच्या 'लक्ष्य' या चित्रपटात त्याने आयुष्यात ध्येयाची जाणीव नसल्याने आळशीपणाने व्यर्थ जीवन घालणाऱ्या तरूणास ध्येयाची जाणीव झाल्यानंतर ते साध्य करतानापर्यंतचा प्रवास दाखविला आहे.

त्यानंतर शाहरूख खानला घेऊन केलेला 'डॉन' या चित्रपटाचा रिमेकही त्याच्या वेगळेपणाने गाजला. एकूणात फरहान अख्तर हा वेगळ्या वाटेचा प्रवासी आहे. त्याने आपल्या वेगळ्या हाताळणीने ठसा उमटविला आहे. त्यामुळे भविष्यात या सर्जनशील दिग्दर्शकाकडून मोठ्या अपेक्षा आहेत.

फरहान अख्तरने दिग्दर्शित केलेले चित्रपट-

दिल चाहता है, लक्ष्य, डॉन

पुरस्कार-
उत्कृष्ट पटकथा - फिल्मफेअर- चित्रपट (दिल चाहता है)