एसआरके, किंग खान आणि बॉलीवूडचा बादशहा या उपाध्यांनी उल्लेख केल्या जाणार्‍या शाहरूख खानचा आज वाढदिवस. शाहरूख आज वयाची ४४ वर्षे पूर्ण करीत आहे. अमिताभ बच्चनंतर बॉलीवूडमध्ये लोकप्रियता मिळवलेला त्याच्यासारखा दुसरा कलावंत नाही हे आज कुणीही मान्य करेल.
परदेशस्थ भारतीयांमध्ये तर तो जबरदस्त लोकप्रिय आहे. जगातील कानाकोपर्‍यात त्याचे चाहते आहेत. बॉलीवूड म्हणजे शाहरूख अशी त्याची जगात ओळख आहे.
शाहरूखसाठी मागचा काही काळ फारसा चांगला गेलेला नाही. पण तरीही त्याची लोकप्रियता मात्र कायम आहे. ओम शांती ओम, चक दे इंडिया व रब ने बना दी जोडी हे त्याचे मागचे चित्रपट चांगलेचहिट ठरले आहेत. पण अभिनयाव्यतिरिक्त त्याने इतर क्षेत्रात हात घातला तिथे मात्र त्याला अपयशच हाताला लागले.
आयपीएलमध्ये त्याच्या कोलकता नाईट रायडर्स या संघाला दारूण पराभव पहावा लागला. छोट्या पडद्यावर त्याच्या 'क्या आप पाचवी पास से तेज है?' या शो लाही यश मिळवता आले नाही. चित्रपट निर्मितीत उतरल्यानंतरही त्याचे हात पोळून निघाले. अमेरिकेत काही दिवसांपूर्वीच त्याला दुर्वतर्णुक मिळाल्याचा किस्सा गाजला. सलमान खानशी वाजल्यानंतर बॉलीवूडमधील एक गट त्याच्याविरोधात काम करतो आहे. पण तरीही शाहरूख आजही बॉलीवूडचा निर्विवाद किंग आहे.
शाहरूखने सध्या कामही कमी केले आहे. तो निवडकच चित्रपट करतो. आदित्य चोप्रा, करण जौहर आणि फराह खान यांच्याबरोबरच काम करणे तो पसंत करतो. त्यात मध्यंतरी त्याच्या खांद्याला दुखापत झाल्याने त्याच्या हालचालींवर आणि चपळाईवरही मर्यादा आल्या आहेत.
सध्या तो करण जौहरची 'माय नेम इज खान' हा चित्रपट करतो आहे. त्यात त्याच्यासोबत काजोल आहे. काजोलसोबत केलेला एकही चित्रपट आतापर्यंत फ्लॉप गेलेला नाही. याशिवाय 'रॉ-१' नावाचा चित्रपट तो करतो आहे. फराह खानचा हा चित्रपट असेल आणि तो जागतिक दर्जाचा असावा असे त्यांचे प्रयत्न आहेत.
