आगामी विधानसभा निवडणुकीच्या तोंडावर महायुतीमध्ये तणाव निर्माण झाला आहे. जागावाटपावरून भाजप आणि शिवसेना व अन्य घटक पक्षांमध्ये दरी निर्माण होण्याची शक्यता निर्माण झाली आहे. एकीकडे जागा वाटपात निम्म्या जागा मिळाव्यात म्हणून भाजपचे नेते ठाम आहेत. भाजपचे राष्ट्रीय अध्यक्ष अमित शहा येत्या 4 सप्टेंबरला मुंबईत येत आहेत. मात्र शिवसेना पक्षप्रमुख उद्धव ठाकरे यांची भेट घेणार नसल्याची माहिती मिळाली आहे. त्यामुळे महायुतीत आणखी तणाव निर्माण होण्याची शक्यता आहे.
गेली 25 वर्षांपासून भाजप- शिवसेनेने अनेक निवडणुका एकत्र लढवल्या आहेत. मात्र यंदा होऊ घातलेल्या विधानसभा निवडणुकांआधी शिवसेना भाजपात मतभेदही निर्माण झाले आहेत. मात्र, वेळीच हे मतभेट मिटवले नाहीत तर दोन्ही पक्षांना निवडणुकीत मोठा फटका बसण्याची शक्यता जाणकारांनी वर्तवली आहे.
दरम्यान, नुकत्याच झालेल्या लोकसभा निवडणुकीत भाजपला घवघवीत यश मिळालं त्या जोरावर विधानसभा निवडणुकीत निम्म्या जागांची मागणी भाजपचे नेते करत आहेत. जिथे संधी मिळेल तेथे सेनेला दाबण्याचा प्रयत्न भाजप नेत्यांकडून होतोय. या पार्श्वभूमीवपर शिवसेनेनेही विधानसभेच्या सर्वच्या सर्व म्हणजेच 288 मतदारसंघात लढण्याची तयारी ठेवलीय. शिवसेनेने राज्यातील प्रमुख पदाधिकार्‍यांची पाच सप्टेंबरला बैठक ठेवली आहे.
