कर्नाटक सरकारने राज्यभरात हुक्का बारवर बंदी घालण्याचे विधेयक मंजूर केले असून, या बंदीचे उल्लंघन करणाऱ्यांना एक ते तीन वर्षांचा तुरुंगवास आणि एक लाख रुपयांपर्यंतच्या दंडाची तरतूद आहे.
अधिसूचनेनुसार नागरिकांच्या आरोग्याचे रक्षण करण्यासाठी आणि तंबाखूजन्य आजारांना प्रतिबंध करण्यासाठी विद्यमान सिगारेट आणि इतर तंबाखू उत्पादने कायद्यात (COTPA) सुधारणा केल्यानंतर ही बंदी लागू करण्यात आली आहे. याव्यतिरिक्त राज्याने 21 वर्षांखालील लोकांना सिगारेट आणि इतर तंबाखूजन्य पदार्थांची विक्री करण्यास मनाई केली आहे.
हुक्का म्हणजे काय?
बरेच लोक सिगारेटऐवजी हुक्का पिणे पसंत करतात, परंतु काहीवेळा वेगवेगळ्या फ्लेवरचा हुक्का सिगारेट पिण्यापेक्षा जास्त धोकादायक असू शकतो. फ्लेवर्स कोळशावर गरम केले जातात आणि नंतर धूर ट्यूब आणि मुखपत्राद्वारे आत घेतला जातो. हुक्क्यातून निघणाऱ्या धुरात सिगारेटच्या धुरासारखे विषारी घटक असतात, ज्यात निकोटीन आणि टारचा समावेश असतो. एका संशोधनानुसार हुक्क्याच्या धुरात किमान 82 विषारी रसायने आणि कार्सिनोजेन्स आढळून आले आहेत. पाण्यातून जात असूनही तंबाखूमध्ये असलेली घातक रसायने तुमची मोठ्या प्रमाणात हानी करतात. याशिवाय कोळशातूनही वायू निर्माण होतो जो धोकादायक ठरू शकतो.
हुक्क्यामुळे होणारी हानी
त्याच्या सेवनाने फुफ्फुसांवर सर्वाधिक परिणाम होतो. क्रॉनिक ऑब्स्ट्रक्टिव्ह पल्मोनरी डिसीज आणि ब्रॉन्कायटिस, हृदयविकाराचा झटका आणि संबंधित रोग इ. इतकेच नाही तर वेगवेगळे कर्करोग होण्याचा धोकाही वाढतो. विशेषतः हुक्का स्मोकिंगमुळे फुफ्फुसाचा आणि तोंडाचा कर्करोग होऊ शकतो.