ओडिशातील कटकमध्ये मकर संक्रांती मेळाव्यादरम्यान बडंबा-गोपीनाथपूर टी-ब्रिजवर चेंगराचेंगरी झाल्याची घटना समोर आली आहे. या चेंगराचेंगरीत एका महिलेचा मृत्यू झाला असून 20 जण जखमी झाले असून त्यापैकी चार जणांची प्रकृती चिंताजनक आहे. एका पोलीस अधिकाऱ्याने सांगितले की, मकरमेळ्यानिमित्त बडंबा-गोपीनाथपूर टी-ब्रिजवर मोठ्या संख्येने लोक जमल्याने ही घटना घडली.
मुख्यमंत्री नवीन पटनायक यांनी या घटनेवर शोक व्यक्त केला आहे. यासोबतच त्यांनी मृतांच्या नातेवाईकांना प्रत्येकी पाच लाख रुपयांची मदत जाहीर केली आहे. मुख्यमंत्री नवीन पटनायक यांनीही एक निवेदन जारी केले आहे. यामध्ये त्यांनी अपघातातील जखमींना लवकरात लवकर बरे होण्यासाठी शुभेच्छा दिल्या व जखमींवर मोफत उपचार केले जातील असे सांगितले.
बडंबा-नरसिंगपूरचे आमदार आणि माजी मंत्री देबी प्रसाद मिश्रा यांनी सांगितले की, या घटनेत अंजना स्वेन नावाच्या 45 वर्षीय महिलेचा मृत्यू झाला आहे. तर चार जणांची प्रकृती चिंताजनक आहे. ज्यांना कटक शहरातील एससीबी मेडिकल कॉलेज हॉस्पिटलमध्ये दाखल करण्यात आले. मिश्रा म्हणाले की, इतर जखमींना बडंबा येथील सामुदायिक आरोग्य केंद्रात (CHC) दाखल करण्यात आले आहे.
भगवान सिंहनाथाला नमस्कार करण्यासाठी दुपारी जत्रेत आलेल्या महिला आणि लहान मुलांसह भाविकांची संख्या अचानक वाढल्याने ही घटना घडली. कोरोना महामारीमुळे दोन वर्षांच्या कालावधीनंतर लोक मंदिरात दर्शनासाठी येत असल्याने या जत्रेला खूप गर्दी झाल्याचे जिल्हा प्रशासनाचे म्हणणे आहे.
