Ayodhya News : कॅनडास्थित खलिस्तानी नेता गुरपतवंत सिंग पन्नू यांनी हल्ल्याची धमकी देणारा व्हिडिओ जारी केल्यानंतर मंगळवारी सकाळी अयोध्येतील राम मंदिराभोवती सुरक्षा व्यवस्था कडक करण्यात आली.
मिळालेल्या माहितीनुसार एका कथित व्हिडिओ संदेशात पन्नू म्हणाले की, 16-17 नोव्हेंबरला अयोध्येतील राम मंदिरात रक्तपात होईल. तसेच आता 18 नोव्हेंबरला राम मंदिरात राम विवाह उत्सव होणार असल्याने अयोध्या प्रशासन अधिक सतर्क झाले आहे. त्यात उत्तर प्रदेशचे मुख्यमंत्री योगी आदित्यनाथ उपस्थित राहण्याची शक्यता आहे.
पोलिसांनी सांगितले की, या धमकीनंतर संपूर्ण अयोध्या शहराला बालेकिल्ल्याचे रूप आले आहे. रामजन्मभूमी परिसराभोवतीची सुरक्षा अधिक मजबूत करण्यात आली आहे. संपूर्ण मंदिर नगरासह रामजन्मभूमी संकुलातील महत्त्वाच्या ठिकाणी दहशतवादविरोधी पथकाचे सुरक्षा कर्मचारी तैनात करण्यात आले आहे.
तसेच अयोध्येचे वरिष्ठ पोलिस अधीक्षक आर.के. नय्यर यांनी सांगितले की, "या माहितीनंतर आम्ही सुरक्षा वाढवली आहे आणि धमकीची माहिती मिळाल्यानंतर, कडक सुरक्षा व्यवस्था करण्यात आली आहे." अयोध्येचे महापौर गिरीश पती त्रिपाठी यांनी या धमकीवर प्रतिक्रिया देताना सांगितले की, अयोध्येचे संरक्षण हनुमानजी करत आहे, त्यामुळे येथे कोणीही हल्ला करण्याचे धाडस करू शकत नाही.
Edited By- Dhanashri Naik
