राजकुमार यादवचा ‘न्यूटन’ हा चित्रपट ऑस्करच्या स्पर्धेतून बाहेर पडला आहे. ‘ऑस्कर’च्या परदेशी भाषेतील चित्रपटांच्या विभागासाठी भारताकडून अधिकृतपणे ‘न्यूटन’ची प्रवेशिका पाठवण्यात आली होती. वेगवेगळ्या भारतीय भाषांमधील २६ चित्रपटांमधून ‘न्यूटन’ला ऑस्करच्या शर्यतीत पाठवण्याचा निर्णय १४ सदस्यीय निवड समितीने घेतला होता. ऑस्करने ट्विटरवरून अकॅडमी अवॉर्डच्या ‘फॉरेन लॅग्वेज फिल्म अवॉर्ड’ (परदेशी भाषा) विभागात जागा मिळवणा-या नऊ चित्रपटांची यादी जाहीर केली. या यादीत ‘अ फनटॅस्टिक वूमन’, ‘इन द फेड’, ‘ऑन बॉडी अ‍ॅण्ड सोल’, ‘फॉक्सट्राट’, ‘द इनसल्ट’, ‘लव्हलेस’, ‘फेलिसीट’, ‘द स्क्वायर’, ‘द वूंड’ चित्रपटांचा समावेश आहे.
अमित मसूरकर या मराठमोळ्या दिग्दर्शकाने ‘न्यूटन’चे दिग्दर्शन केले होते. या चित्रपटातून लोकशाही व्यवस्था आणि निवडणुका ही आपल्या समाजव्यवस्थेची दरवर्षी रंगणारी सर्कस दाखवताना दिग्दर्शक अमित मसूरकरने या व्यवस्थेतील मूळ विसंगतीवरच या चित्रपटातून अचूक बोट ठेवले होते.
