नेपाळमध्ये मान्सूनचे आगमन होताच मुसळधार पावसाचा कालावधी सुरू झाला आहे. पूर्व नेपाळमध्ये मुसळधार पावसामुळे आलेल्या पूर आणि भूस्खलनात किमान 26 लोक बेपत्ता झाले आहेत. दोन जणांचा मृत्यू झाल्याची पुष्टी झाली आहे. नेपाळ पोलिसांनी दिलेल्या माहितीनुसार, शनिवारी संध्याकाळपासून गेल्या 24 तासांत तीन वेगवेगळ्या जिल्ह्यांत लोक बेपत्ता झाले आहेत.
संखुवसभेतील जलविद्युत प्रकल्पात काम करणारे 16 कामगार बेपत्ता आहेत. पुरात सात घरेही वाहून गेली आहेत. एका मजुराचा मृतदेह सापडला असून, त्याची ओळख पटवण्याचा प्रयत्न सुरू आहे. दुसरीकडे, पाचथर जिल्ह्यात पुरात पाच जण बेपत्ता झाल्याचे वृत्त आहे. पुरात रस्ते वाहून गेल्याने विविध भागांचा संपर्क तुटला आहे.
भूस्खलनामुळे एक घर उद्ध्वस्त झाले, ज्यामध्ये चार लोक ढिगाऱ्याखाली गाडले गेले. लोकांचा शोध घेण्यासाठी सर्च ऑपरेशन सुरू आहे. नेपाळचे पंतप्रधान पुष्प कुमार दहल यांनी अधिकाऱ्यांना मदत आणि बचाव कार्याला गती देण्याच्या सूचना दिल्या आहेत.
यावर्षी मान्सूनमुळे 12 लाखांहून अधिक लोक बाधित होऊ शकतात, असे त्यांनी यापूर्वी सांगितले होते. त्यापैकी मधेस प्रांतात चार लाख तर कोशी प्रांतात तीन लाख लोक बाधित होणार आहेत. लुंबिनी प्रांतात दोन लाख आणि बागमती प्रांतात एक लाख लोक बाधित होणार आहेत.
