आयपीएलच्या 15 व्या हंगामातील 10 वा सामना गुजरात टायटन्स आणि दिल्ली कॅपिटल्स यांच्यात पुण्यातील एमसीए स्टेडियमवर खेळला जात आहे. या सामन्यात दिल्लीचा कर्णधार ऋषभ पंतने नाणेफेक जिंकून प्रथम क्षेत्ररक्षण करण्याचा निर्णय घेतला. हार्दिक पांड्या गुजरातचे कर्णधारपद सांभाळत आहे. प्रथम फलंदाजी करताना गुजरातने निर्धारित 20 षटकांत 6 गड्यांच्या मोबदल्यात 171 धावा केल्या.
नाणेफेक हरल्यानंतर प्रथम फलंदाजी करणाऱ्या गुजरातची सुरुवात खराब झाली. या मोसमातील पहिला सामना खेळणाऱ्या मुस्तफिझूर रहमानने पहिल्या षटकाच्या तिसऱ्या चेंडूवर मॅथ्यू वेडला (1) यष्टिरक्षक पंतकडे झेलबाद केले. यानंतर विजय शंकरलाही विशेष काही करता आले नाही. 20 चेंडूत 13 धावांची संथ खेळी खेळल्यानंतर तो बाद झाला. शंकर आणि शुभमनमध्ये 35 चेंडूत 42 धावांची भागीदारी झाली. यानंतर कर्णधार हार्दिक पांड्याने शुभमन गिलसह डावाची धुरा सांभाळली. दोघांनी तिसऱ्या विकेटसाठी 47 चेंडूत 65 धावांची भागीदारी केली.
