चेन्नईचा कर्णधार महेंद्रसिंह धोनीने कामगार दिनी खास आठवणीत राहील असे फोटोसेशन केले आहे. धोनीने पुण्यातील मैदानाची देखरेख करणाऱ्या कामगारांची भेट घेत त्यांच्यासोबत फोटो काढला. चेन्नई सुपर किंग्जच्या इन्स्टाग्राम अकाऊंटवरून धोनीचा हा खास फोटो शेअर करण्यात आला आहे. धोनीचा हा फोटो चांगलाच व्हायरल झाला असून त्याच्या या वृत्तीचे सर्वांनीच कौतुक केले आहे. या फोटोमध्ये धोनीच्या दोन्ही बाजुला मैदानाची देखरेख करणारे कामगार आणि इतर कर्मचारी दिसत आहेत. चेन्नईने ट्विटरवरही धोनीचे कर्मचाऱ्यांसोबतचे फोटो शेअर करत लिहिले आहे की, ‘मैदानावरील खेळ चांगला व्हावा यासाठी काम करणाऱ्या सर्व लोकांना आंतरराष्ट्रीय कामगार दिनाच्या शुभेच्छा, त्यांच्यासाठी हा दिवस आनंदाचा राहिला. पुणे आणि चेपॉक मैदानावरील या कर्मचाऱ्यांना ही भेट.’
