क्रिकेट दक्षिण आफ्रिका (CSA) ने भारताविरुद्धच्या आगामी मालिकेसाठी नवीन वेळापत्रक जाहीर केले आहे, ज्यामध्ये तीन कसोटी आणि तीन एकदिवसीय सामने आहेत. नवीन वेळापत्रकानुसार, भारत 26 डिसेंबरपासून बॉक्सिंग डे कसोटीने दक्षिण आफ्रिका दौऱ्यावर आपल्या मोहिमेची सुरुवात करेल. सेंच्युरियनच्या सुपरस्पोर्ट पार्कमध्ये हा सामना होणार आहे. दोन्ही संघांमधील तीन सामन्यांच्या कसोटी मालिकेतील दुसरा कसोटी सामना 3 ते 7 जानेवारी 2022 जोहान्सबर्ग येथे खेळवला जाईल आणि तिसरी आणि अंतिम कसोटी 11 ते 15 जानेवारी 2022 दरम्यान केपटाऊन येथील न्यूलँड्स स्टेडियमवर खेळवली जाईल.
यानंतर दोन्ही संघांमधील तीन सामन्यांची वनडे मालिका सुरू होईल. एकदिवसीय मालिकेतील पहिला सामना 19 जानेवारी रोजी पार्ल येथे, दुसरा सामना 21 जानेवारी रोजी पार्ल येथे आणि तिसरा आणि अंतिम एकदिवसीय सामना 23 जानेवारी रोजी केपटाऊन येथील न्यूलँड्स स्टेडियमवर खेळवला जाईल. कसोटी मालिका आयसीसी जागतिक कसोटी चॅम्पियनशिपचा भाग आहे.
हा भारत दौरा यापूर्वी 17 डिसेंबरपासून सुरू होणार होता. दक्षिण आफ्रिका दौऱ्यावर भारताला चार सामन्यांची टी-20 मालिकाही खेळायची होती. पण कोरोना विषाणूच्या ओमिक्रॉन या नवीन व्हेरियंटच्या प्रसारादरम्यान भारतीय क्रिकेट संघाच्या वेळापत्रकात बदल करण्यात आला आहे. भारतीय संघ दक्षिण आफ्रिका दौऱ्यावर चार T20 आंतरराष्ट्रीय सामने खेळणार होता, जो पुढे ढकलण्यात आला आहे आणि नवीन तारखा नंतर ठरवल्या जातील.
तीन सामन्यांची कसोटी मालिका
पहिली कसोटी - 26-30 डिसेंबर, सेंच्युरियन
दुसरी कसोटी - 3-7 जानेवारी, जोहान्सबर्ग
तिसरी कसोटी - 11-15 जानेवारी, केपटाऊन
तीन सामन्यांची एकदिवसीय मालिका
पहिली वनडे - 19 जानेवारी, पार्ल
दुसरी वनडे - 21 जानेवारी, पार्ल
तिसरी वनडे - 23 जानेवारी, केपटाऊन
