IPL 2024: गुजरात टायटन्सने आपल्या नवीन कर्णधाराच्या नावाची घोषणा केली आहे. हार्दिक पांड्या गुजरातमधून मुंबई इंडियन्समध्ये ट्रेडिंग विंडोद्वारे परतला आहे. सोमवारी याला अधिकृत दुजोरा देण्यात आला. यासोबतच गुजरातने आपला नवा कर्णधारही नियुक्त केला आहे. संघाने सलामीवीर शुभमन गिलला आपला नवा कर्णधार बनवले आहे.
गुजरात टायटन्सचे क्रिकेट संचालक विक्रम सोलंकी म्हणाले, शुभमन गिलने गेल्या दोन वर्षांत खेळाच्या सर्वोच्च स्तरावर चांगली प्रगती केली आहे. फक्त एक फलंदाज म्हणून नव्हे तर क्रिकेटमध्ये एक नेता म्हणूनही त्याला आपण परिपक्व पाहिले आहे. मैदानावरील त्याच्या योगदानामुळे गुजरात टायटन्सला एक शक्ती म्हणून उदयास येण्यास मदत झाली आहे. त्याची परिपक्वता आणि कौशल्य त्याच्या मैदानावरील कामगिरीमध्ये स्पष्टपणे दिसून येते. त्याला कर्णधार बनवण्यासाठी आम्ही उत्सुक आहोत.
शुभमन गिल आयपीएल 2023 मध्ये सर्वाधिक धावा करणारा खेळाडू होता आणि त्याने ऑरेंज कॅप देखील जिंकली होती. गिलने 17 सामन्यात 59.33 च्या सरासरीने 890 धावा केल्या. केन विल्यमसनही गुजरात टायटन्सचा कर्णधार होण्याच्या शर्यतीत होता, पण भविष्य डोळ्यासमोर ठेवून फ्रँचायझीने युवा फलंदाजाला महत्त्व दिले आहे.
24 वर्षीय शुभमन गिलने 2018 मध्ये कोलकाता नाइट रायडर्सकडून आयपीएलमध्ये पदार्पण केले. गिलने त्याच्या आयपीएल कारकिर्दीत आतापर्यंत 91 सामने खेळले आहेत. ज्यामध्ये त्याने 37.70 च्या सरासरीने 2790 धावा केल्या आहेत. या काळात त्याने 3 शतके आणि 18 अर्धशतके झळकावली. त्याची आयपीएलमधील सर्वोच्च धावसंख्या129 धावा आहे. गिलने त्याच्या आयपीएल कारकिर्दीत 273 चौकार आणि 80 षटकार मारले आहेत.
