हा हिंददेश माझा

आनंदकंद ऐसा । हा हिंददेश माझा ॥

सत्यास ठाव देई, वृत्तीस ठेवि न्यायी

सत्यास मानि राजा । हा हिंददेश माझा ॥

जगदीश जन्म घेई, पदवीस थोर नेई

चढवी स्वधर्मसाजा । हा हिंददेश माझा ॥

जनकादि राजयोगी, शुक वामदेव त्यागी

घुमवीति कीर्तीवाजा । हा हिंददेश माझा ॥

गंगा हिमाचलाची, वसती जिथें सदाची

होऊनि राहि कलिजा । हा हिंददेश माझा ॥

पृथुराज सिंह शिवजी, स्वातंत्र्यवीर गाजी

करिती रणांत मौजा । हा हिंददेश माझा ॥

तिलकादि जीव देहीं, प्रसवूनि धन्य होई

मरती स्वलोककाजा । हा हिंददेश माझा ॥

जगिं त्याविना कुणीही, स्मरणीय अन्य नाहीं

थोरांत थोर समजा । हा हिंददेश माझा ॥

पूजोनि त्यास जीवें, वंदोनि प्रेमभावें

जयनाद हाचि गर्जा । हा हिंददेश माझा ॥

कवी- आनंद कृष्णाजी टेकाडे