मुंबईत १६ वर्षाच्या मुलाने आपल्या १५ वर्षाच्या मैत्रिणीला ३१ व्या मजल्यावरून खाली ढकलले

मुंबई पोलिसांनी एका अल्पवयीन मुलाला अटक केली आहे, ज्यावर १५ वर्षांच्या मुलीला ३१ व्या मजल्यावरून ढकलल्याचा आरोप आहे. पोलिसांनी सांगितले की, मुलाने मुलीला ढकलून तिची हत्या केली.

मिळालेल्या माहितीनुसार मुंबई पोलिसांनी एका अल्पवयीन मुलाविरुद्ध हत्येचा गुन्हा दाखल केला आहे. ही माहिती देताना एका अधिकाऱ्याने सांगितले की, या मुलावर मुंबईतील इमारतीच्या छतावरून १५ वर्षांच्या मुलीला ढकलून दिल्याचा आरोप आहे. आरोपी आणि किशोरी दोघेही मित्र होते. किशोरी एका आंतरराष्ट्रीय शाळेची विद्यार्थिनी होती आणि मुलुंड परिसरात तिच्या आईसोबत राहत होती. भांडुप पोलिस अधिकाऱ्यांनी मंगळवारी सांगितले की, २४ जून रोजी किशोरी भांडुप (पश्चिम) परिसरातील एका गृहनिर्माण सोसायटीत मुलाला भेटण्यासाठी पोहोचली आणि अभ्यासाच्या ताणाबद्दल त्याच्याशी चर्चा केली.

अधिकाऱ्याने सांगितले की, यानंतर मुलगा तिला इमारतीच्या डी-विंगच्या छतावरील पाण्याच्या टाकीच्या वर घेऊन गेला. ते गप्पा मारत असताना, 'डेटिंग'वरून त्यांच्यात जोरदार वाद झाला. वादविवादादरम्यान, मुलाने मुलीला ढकलले, ज्यामुळे किशोरवयीन मुलगी इमारतीवरून पडली आणि तिचा मृत्यू झाला, असे त्यांनी सांगितले. त्यानंतर मुलाने मुलीचा मोबाईल फोन छतावरून फेकून दिला, जो इमारतीच्या ई-विंगजवळ पडला. एका सुरक्षा रक्षकाने इमारतीच्या 'डक्ट'मध्ये मुलीचा मृतदेह पाहिला आणि पोलिसांना कळवले. तपासादरम्यान, मुलाने पोलिसांना सांगितले की, अभ्यासाच्या ताणामुळे मुलीने ३० व्या आणि ३१ व्या मजल्यामधील खिडकीतून उडी मारून आत्महत्या केली, असे अधिकाऱ्यांनी सांगितले. इमारतीचे सीसीटीव्ही फुटेज तपासल्यानंतर, पोलिसांनी मुलाला ताब्यात घेतले, ज्याने नंतर आपला गुन्हा कबूल केला, असे अधिकाऱ्यांनी सांगितले.

Edited By- Dhanashri Naik