चहा पानाच्या पाऊचमध्ये कोट्यवधी रुपयांच्या हिऱ्यांची तस्करी केल्याचे प्रकरण समोर आले आहे. कस्टम विभागाने आरोपीला मुंबई आंतरराष्ट्रीय विमानतळावरून अटक केली आहे. मुकीम रजा अश्रफ मन्सुरी असे आरोपीचे नाव असून तो मुंबईहून दुबईला जात होता. सध्या आरोपीची चौकशी सुरू आहे.
मिळालेल्या माहितीनुसार, मुंबईतील नळ बाजार परिसरात राहणारा 30 वर्षीय मुकीम रजा अश्रफ हा मुंबईहून दुबईला जात होता. दरम्यान, कस्टमच्या एअर इंटेलिजन्स युनिटने मन्सूरीला मुंबईतील छत्रपती शिवाजी महाराज आंतरराष्ट्रीय विमानतळावर रोखले.
तपासादरम्यान, मन्सूरीच्या बॅगमधून प्रसिद्ध चहा ब्रँडची पिशवी जप्त करण्यात आली. या पाऊचची तपासणी केली असता यातील आठ पाऊचमध्ये 34 हिरे आढळून आले. ज्याची किंमत सुमारे दीड कोटी रुपये आहे. हिरे तस्करीसाठी पाच हजार रुपये देण्याचे वचन दिल्याचे आरोपीने सांगितले. सध्या आरोपीला अटक करण्यात आली असून त्याची चौकशी सुरू आहे.
