नवी मुंबईतील गणेश मूर्तीच्या विसर्जन मिरवणुकीत महिलेचा विनयभंग आणि गैरवर्तन केल्याप्रकरणी रिक्षाचालकाविरुद्ध गुन्हा दाखल करण्यात आला आहे. पोलिसांनी मंगळवारी ही माहिती दिली.
अनेक कलमान्वये गुन्हा दाखल
पोलिसांनी सांगितले की, तुर्भे येथे 24 सप्टेंबर रोजी घडलेल्या घटनेसाठी पोलिसांनी महिलेवर प्राणघातक हल्ला किंवा फौजदारी बळजबरी आणि इतर संबंधित तरतुदींनुसार गुन्हा दाखल केला आहे.
दारूच्या नशेत महिलेचा हात पकडला
पीडितेने दिलेल्या तक्रारीनुसार 24 सप्टेंबर रोजी रात्री 10 वाजण्याच्या सुमारास गणेश मूर्ती विसर्जन मिरवणूक तुर्भे नाक्यावरून जात असताना दारूच्या नशेत असलेल्या आरोपीने तिचा हात पकडून तिला शिवीगाळ करण्यास सुरुवात केली.
अद्याप अटक नाही
पीटीआय या वृत्तसंस्थेने दिलेल्या माहितीनुसार, अधिकाऱ्याने सांगितले की आरोपीने तिचा विनयभंग केल्यावर दोघांमध्ये जोरदार वाद झाला. ते म्हणाले की पोलीस या घटनेचा तपास करत असून याप्रकरणी अद्याप कोणालाही अटक करण्यात आलेली नाही.
19 सप्टेंबरपासून देशभरात 10 दिवसीय गणेशोत्सवाला सुरुवात झाली आहे. आता मुंबईसह महाराष्ट्राच्या इतर भागात दुसऱ्या दिवसापासून मूर्तींचे विसर्जन सुरू आहे. माहितीनुसार बृहन्मुंबई महानगरपालिकेने (BMC) यावर्षी मूर्ती विसर्जनासाठी 69 नैसर्गिक पाणवठ्यांचा (समुद्रकिनाऱ्यासह) समावेश केला आहे आणि 191 कृत्रिम तलाव स्थापित केले आहेत.
सुरक्षा कर्मचारी तैनात
गणेशोत्सवाच्या पार्श्वभूमीवर मुंबई पोलिसांनी शहरात 2,094 अधिकारी, 11083 कॉन्स्टेबल, राज्य राखीव पोलीस दल (SRPF), क्विक रिस्पॉन्स टीम (QRT), जलद कृती दल आणि होमगार्डच्या 32 प्लाटून तैनात केले आहेत. विसर्जनाच्या वेळी मोठी गर्दी जमते, त्यामुळे कोणत्याही प्रकारची चेंगराचेंगरी आणि गुन्हेगारी घटना घडू नयेत यासाठी मोठ्या प्रमाणात पोलीस बंदोबस्त तैनात केला जातो.
