शहरात शस्त्रास्त्रे विक्री करणाऱ्या टोळीला पकडण्यात पोलिसांना यश आले आहे. मखमलाबाद रोड परिसरातील ड्रीम कॅसल चौकात फिरणार्‍या ३ संशयितांना पंचवटी पोलिसांनी अटक केली आहे. तर त्यांच्याकडून ६ गावठी पिस्तूले व ९ जिवंत काडतुसे जप्त करण्यात आली आहे .
मध्यप्रदेशातून काहीजण शस्त्रे विकण्यासाठी येणार असल्याची गुप्त माहिती पोलिसांना मिळाली. त्यानुसार पंचवटी पोलिसांनी सापळा रचला . त्यात शक्तिसिंह राजपूत , संतोष अल्हाट, सुनील नाथभजन आरोपींना पकडण्यात आले. या संशयिताकडून गावठी पिस्तूलांची खरेदी करण्यासाठी काहीजण येत होते, त्यापुर्वीच त्यांना पोलिसांनी ताब्यात घेतले आहे .
आरोपींनी पोलिसांची दिशाभूल करण्याचा प्रयत्न केला. मात्र पोलिसांनी त्यांची झडती घेतली असता त्यांच्याकडे ६ गावठी पिस्तूल, ९ जिवंत काडतुसे आढळून आली. तसेच त्यांच्याकडून एक लाख पेक्षा अधिक रक्कमही पोलिसांनी जप्त केली आहे. गणेशोत्सवात घातपात करण्याचा डाव असल्याचा संशय पोलिसांना असून याविषयी पोलीस तपास करत आहेत.
