उत्तर प्रदेशातील बुलंदशहरमध्ये एक मोठा अपघात घडला. एका कल्व्हर्टला धडकल्यानंतर कारला आग लागली. आगीमुळे 5 जण जिवंत जळाले. या अपघातात एक तरुणी जखमी झाली. ही दुर्घटना पहाटे 5 वाजण्याच्या सुमारास घडली. पोलिसांनी मृतांचे मृतदेह शवविच्छेदनासाठी पाठविले आहे.
कारमधील कुटुंब लग्न समारंभातून परत येत असताना जहांगीराबाद कोतवाली परिसरातील चांदोक गावाजवळ स्विफ्ट कार रस्त्याच्या कडेला असलेल्या कल्व्हर्टला धडकली आणि उलटली. कार उलटल्यानंतर सीएनजी कारला आग लागली. कारमधील सर्वजण कारमध्ये अडकले आणि कुटुंबातील ५ जण जिवंत जळून मृत्युमुखी पडले.
कारच्या आगीत अडकलेले सर्व लोक मदतीसाठी ओरडत होते परंतु बराच वेळ मदत मिळाली नाही. अपघातानंतर 2 तासांनी जहांगीराबाद पोलिस स्टेशनचे प्रभारी घटनास्थळी पोहोचले आणि जळालेल्या कारमधून पाच जळालेले मृतदेह बाहेर काढले आणि शवविच्छेदनासाठी पाठवले. अपघातादरम्यान कारमधून बाहेर पडलेल्या मुलीला जखमी अवस्थेत जिल्हा रुग्णालयात दाखल करण्यात आले आहे.
