श्रीनगर- जम्मू-काश्मीरच्या श्रीनगर जिल्ह्यातील झेलम नदीत मंगळवारी बोट उलटून चार जणांचा मृत्यू झाला, तर तीन जण जखमी झाले. या भागात गेल्या काही दिवसांपासून होत असलेल्या मुसळधार पावसामुळे झेलम नदीच्या पाणी पातळीत वाढ झाली आहे.
अधिकाऱ्यांनी सांगितले की, जिल्ह्यातील गंडाबल येथील झेलम नदीत सात जणांना घेऊन जाणारी बोट उलटली. अधिकाऱ्यांनी सांगितले की, "एसडीआरएफ, पोलिस आणि लोकांनी ताबडतोब बचावकार्य सुरू केले. अपघातात चार जणांचा मृत्यू झाला, तर तिघांना उपचारासाठी श्रीनगरमधील एसएमएचएस रुग्णालयात पाठवण्यात आले आहे."
"पीडितांचे मृतदेह सापडले आहेत आणि वैद्यकीय-कायदेशीर औपचारिकता पूर्ण केल्या जात आहेत," अधिकाऱ्यांनी सांगितले. जखमींवर रुग्णालयात उपचार सुरू असल्याची पुष्टी रुग्णालयातील डॉक्टरांनी दिली.
मुसळधार पावसामुळे झेलम नदीची पाण्याची पातळी खूप उंचावली आहे, सोमवारी झालेल्या पावसामुळे भूस्खलन झाल्याने जम्मू-श्रीनगर राष्ट्रीय महामार्ग बंद करण्यात आला होता. जम्मू-काश्मीर वाहतूक पोलिसांनी सांगितले की, "किश्तवारी पाथेरमध्ये मोठ्या प्रमाणावर भूस्खलनामुळे NH-44 ब्लॉक करण्यात आले आहे. लोकांना या भागात प्रवास टाळण्याचा सल्ला देण्यात आला आहे."
