भुवनेश्वर: ओडिशातील मयूरभंज जिल्ह्यातील एका आदिवासी महिलेने आपल्या नऊ महिन्यांच्या मुलीला केवळ 800 रुपयांना विकल्याचा आरोप आहे. पोलिसांनी मंगळवारी सांगितले की, महिलेने मुलीला अपत्यहीन जोडप्याला विकले.या प्रकरणी मुलीची आई , तिला विकत घेणारे जोडपे आणि मध्यस्थी करणाऱ्या महिलेला अटक केली आहे.
करमी मुर्मू असे मुलीच्या आईचे नाव आहे. ही महिला आदिवासीबहुल मयूरभंज जिल्ह्यातील खुंटा पोलीस हद्दीतील माहुलिया गावातील रहिवासी आहे. पोलिसांनी दिलेल्या माहितीनुसार, करमी मुर्मूने आपली मुलगी लिसा हिला महिनाभरापूर्वी बिप्रचरणपूर गावातील फुलमणी एम. आणि अकिल तुडू यांना विकले.
रिपोर्ट्सनुसार, करमीने तिचा नवरा मुशू मुर्मूच्या नकळत मुलगी विकली होती. महिलेचा नवरा तामिळनाडूमध्ये काम करतो आणि बहुतेक कामासाठी घरापासून दूर असतो. पोलिस अधिकाऱ्याने सांगितले की, या जोडप्याला दोन मुली होत्या, त्यापैकी एका मुलीला फक्त 800 रुपयांना विकले गेले.
मुशू नुकताच तामिळनाडूहून घरी परतला तेव्हा त्याला त्याची लहान मुलगी सापडली नाही. तो नाराज झाला आणि त्याने खुंटा पोलीस ठाण्यात मुलगी हरवल्याची एफआयआर दाखल केली. तपासादरम्यान करामीने कबुली दिली की तिने आपल्या मुलीला एका जोडप्याला विकले होते.
करामी यांनी सांगितले की, मुलीला सांभाळणे कठीण जात असल्याने त्यांनी तिला 800 रुपयांना विकले. मुलगी विकत घेणाऱ्या दाम्पत्याचे म्हणणे आहे की, त्यांना मूलबाळ नसल्याने त्यांनी ही मुलगी विकत घेतली आहे.
या प्रकरणी खुंटा पोलिसांनी करमी, मुलीला विकत घेणारे दाम्पत्य आणि सौद्याची मध्यस्थी करणाऱ्या माही मुर्मू यांना अटक केली आहे. बाल कल्याण समिती, बारीपाडा यांच्या उपस्थितीत मुलीची सुटका करून तिला तिच्या आजीकडे सुपूर्द करण्यात आले, असे पोलीस अधिकाऱ्याने सांगितले.
