भारताचे पंतप्रधान नरेंद्र मोदी यांनी इराण-इस्रायल युद्ध थांबवण्यासाठी एक मोठा पुढाकार घेतला आहे. त्यांनी इराणचे राष्ट्राध्यक्ष पेझेश्कियान यांच्याशी फोनवरून संवाद साधला आणि सध्याची तणावपूर्ण परिस्थिती संपवण्यास सांगितले.
मध्यपूर्वेतील संकटाच्या पार्श्वभूमीवर, पंतप्रधान नरेंद्र मोदी यांनी इराणचे अध्यक्ष मसूद पेझेश्कियान यांच्याशी फोनवरून चर्चा केली. पंतप्रधान मोदींनी स्वतः रविवारी 'एक्स' वर याची माहिती दिली. दोन्ही नेत्यांमधील ही चर्चा अशा वेळी झाली जेव्हा इराणच्या अणुकार्यक्रमांना रोखण्यासाठी इस्रायलच्या हल्ल्यांना पाठिंबा देणाऱ्या अमेरिकन सैन्याने रविवारी पहाटे इराणच्या तीन अणुकेंद्रांवर हल्ला केला.
आज सकाळी अमेरिकेने इराणच्या फोर्डो, नतान्झ आणि इस्फहान या तीन अणुस्थळांवर हवाई हल्ले केले आहेत. अमेरिकेचे अध्यक्ष डोनाल्ड ट्रम्प यांनी सोशल मीडियावर ही माहिती दिली. ट्रम्प म्हणाले की, या हल्ल्यामुळे त्यांना दिलासा मिळत आहे.
पंतप्रधान मोदींनी ट्विटरवर पोस्ट केले की, "इराणचे अध्यक्ष मसूद पेझेश्कियान यांच्याशी बोललो. आम्ही सध्याच्या परिस्थितीवर सविस्तर चर्चा केली. अलिकडच्या काळात झालेल्या वाढत्या तणावाबद्दल तीव्र चिंता व्यक्त केली. तणाव कमी करण्यासाठी, संवाद साधण्यासाठी आणि पुढे जाण्यासाठी राजनैतिक कूटनीतिसाठी आमचे आवाहन पुन्हा एकदा मांडले आणि प्रादेशिक शांतता, सुरक्षा आणि स्थिरता लवकरात लवकर पुनर्संचयित करण्याची मागणी केली."
