मुंबई- ‘मातोश्री’वर पहिल्या मजल्यावर राहत असलेला ऐश्वर्य हा माझा मुलगा नसून, स्मिताचा मुलगा आहे. मी त्याचा पिता नाही असे खळबळजनक विधान बाळासाहेब ठाकरेंचे ज्येष्ठ पुत्र जयदेव ठाकरे यांनी उच्च न्यायालयात केले.
मला याविषयी काही सांगायचे आहे आणि ते रेकॉर्डवर आणायचे आहे, असे विधान केल्यानंतर यापुढील सुनावणी इन कॅमेरा करण्याचा निर्णय न्यायालयानेच घेतला.
बाळासाहेब ठाकरेंच्या इच्छापत्रास त्यांचे ज्येष्ठ पुत्र जयदेव यांनी आव्हान दिले असून, त्याची सुनावणी न्या. गौतम पटेल यांच्यापुढे सुरू आहे. ऐश्वर्य यास बाळासाहेबांनी आपला वारस म्हणून मातोश्री बंगल्यातील पहिला मजला दिला आहे. जयदेव यांच्या पूर्वपत्नी स्मिता या ऐश्‍वर्यची आई आहेत. मात्र, आपण ऐश्‍वर्यचे पिता नसल्याचे जयदेव यांनी सांगितले. जयदेव ठाकरेंच्या या विधानानंतर कोर्टानेच तत्काळ सुनावणी थांबवून प्रसारमाध्यमांच्या प्रतिनिधींना बाहेर जायला सांगितले आणि पुढची सुनावणी इन कॅमेरा सुरू झाली.
बाळासाहेब ठाकरे यांच्या मृत्यूनंतर त्यांच्या संपत्तीवरून जयदेव व उद्धव यांच्यात वाद सुरू झाला. उद्धव ठाकरे यांच्या वतीने ज्येष्ठ वकील रोहित कपाडिया यांनी जयदेव यांची उलटतपासणी घेतली.
न्यायालयाचे कामकाज संपल्यानंतर जयेदव यांना माध्यमांच्या प्रतिनिधींनी गाठले व तुम्हाला काही सांगायचे आहे का, असे विचारले. त्यांनी पाऊस खूप छान पडतोय, असे सांगून सुनावणीविषयी बोलणे टाळले.
