बिग बॉस या कार्यक्रमातून बाहेर पडलेल्या कीर्तनकार शिवलिला पाटील यांनी वारकरी संप्रदायाची माफी मागितली आहे.
"माझा तेथे जाण्याचा मार्ग चुकला असला तरी हेतू प्रामाणिक होता. यापुढे ज्येष्ठांचा सल्ला घेतल्याशिवाय असा निर्णय घेणार नाही.
"बिग बॉसमध्ये माझ्या जाण्याच्या निर्णयाने वारकरी संप्रदाय दुखावला असेल तर मी माफी मागते अशा शब्दांमध्ये शिवलीला पाटील यांनी माफी मागितली आहे,बिग बॉसच्या घरातून बाहेर पडणाऱ्या त्या पहिल्या सदस्य आहेत. काही दिवसांपूर्वी तब्येत बरी नसल्याने त्या उपचारासाठी घरातून बाहेर पडल्या होत्या.
शिवलीला बाहेर पडल्यामुळे बिग बॉसच्या घरातील वोटिंग लाइन्स बंद करण्यात आल्या होत्या. शिवलीला पाटील या वारकरी संप्रदायातील कीर्तनकार आहेत.
सोशल मीडियावर शिवलीला या लोकप्रिय आहेत, पण तरीही 'बिग बॉस'च्या घरात कीर्तनकार म्हटल्यावर अनेकांच्या भुवया उंचावल्या होत्या.
"आपण कीर्तनकार आहोत, अध्यात्मात वाढलेली माणसं आहोत. हजार लोक आपल्यासमोर बसून ऐकतात, त्यांच्यासमोर सिद्ध करताना किती गोष्टींना जावं लागतं, असं त्यांना वाटत होतं. पण मी एक वाक्य मनात ठेवलं की किस्मत भी हिम्मतवालों का साथ देती आहे आणि मी धाडस केलं," असं शिवलीला यांनी बिग बॉसच्या घरात प्रवेश करण्याआधी म्हटलं होतं.
