महाराष्ट्रातील गडचिरोलीमध्ये सातत्याने सुरू असलेल्या नक्षलविरोधी कारवाईमुळे नक्षलवाद्यांमध्ये खळबळ उडाली आहे. गडचिरोलीत मोठ्या संख्येने नक्षलवादी सातत्याने सुरक्षा दलांसमोर आत्मसमर्पण करत आहेत. दहशतीमध्ये नक्षलवादी आता सर्वसामान्य नागरिकांना लक्ष्य करत आहेत. गडचिरोलीत रविवारी नक्षलवाद्यांनी एका व्यक्तीची हत्या केल्याची घटना समोर आली आहे.
गडचिरोली जिल्ह्यात नक्षलवाद्यांनी रविवारी एका 45 वर्षीय तरुणाची पोलिसांच्या गुप्तहेराच्या संशयावरून हत्या केली. अधिकाऱ्यांनी सांगितले की, रविवारी पहाटे दक्षिण गडचिरोलीच्या भामरागड तालुक्यातील कीर गावात ही घटना घडली. या घटनेनंतर परिसरात भीतीचे वातावरण आहे.
एका वरिष्ठ पोलीस अधिकाऱ्याने सांगितले की, प्राथमिक माहितीनुसार, नक्षलवाद्यांनी एका निष्पाप नागरिकाचा गळा दाबून खून केला. त्यांनी सांगितले की, सुखराम मडावी असे ठार झालेल्या व्यक्तीचे नाव असून तो कीर गावचा रहिवासी आहे.
नक्षलवाद्यांनी खून झालेल्या व्यक्तीच्या मृतदेहाजवळ पॅम्प्लेट ठेवले होते. यामध्ये, माओवाद्यांनी असा खोटा दावा केला आहे की सुखराम हा पोलिसांचा गुप्तहेर होता आणि त्याने जिल्ह्यातील पेनगुंडा परिसरासह अनेक ठिकाणी नवीन छावण्या उघडण्यात पोलिसांना मदत केली होती.अशी माहिती अधिकाऱ्याने दिली. याप्रकरणी गुन्हा दाखल करण्यात आला असून घटनेचा तपास सुरू असल्याचे पोलिसांनी सांगितले.
