सध्या राज्याला पावसाने झोडपले आहे. अनेक जिल्ह्यांत मुसळधार पाऊस सुरु असून नदी नाले ओसंडून वाहत आहे. धरणे भरली आहे. त्यामुळे आता राज्यातील काही भागातील पाणी संकट टळले आहे. खरीप हंगामातील पिकांना मोठा दिलासा मिळाला आहे.
राज्यात आज देखील मुसळधार पावसाची शक्यता असून 9 जिल्ह्यांना ऑरेंज अलर्ट दिला आहे.
येत्या 24 तासांत कोकण आणि पश्चिम किनारपट्टी भागात पावसाचा जोर वाढण्याची शक्यता हवामान खात्यानं वर्तवली आहे. तसेच मुंबई आणि पुणे येथे मुसळधार पावसाची शक्यता आहे. राज्यातील 9 जिल्ह्यांत ठाणे, रायगड, सिंधुदुर्ग, सातारा, छत्रपती संभाजी नगर, बीड, नांदेड, गडचिरोली, वर्धा, नागपूर आणि अमरावतीत ऑरेंज अलर्ट जारी करण्यात आला आहे.
संपूर्ण मराठवाड्यात आणि उत्तर महाराष्ट्रात पावसाचा यलो अलर्ट जारी केला आहे. मुंबईत, पालघर, पुणे, कोल्हापूर, बुलढाणा, वाशीम, अकोला, यवतमाळ येथे यलो अलर्ट जारी केला आहे. मुंबईत शनिवारी पहाटेपासून मुसळधार पाऊस कोसळत आहे. कोकणातील रत्नागिरी आणि भंडारा, गोंदिया, चंद्रपूर, गडचिरोली जिल्ह्यांना मुसळधार पावसाचा रेड अलर्ट जारी केला आहे. नागरिकांनी कामानिमित्तच बाहेर पडावे असे आवाहन देण्यात आले आहे.
हवामान खात्याने दिलेल्या माहितीनुसार, नागपूरसह विदर्भातील इतर अनेक जिल्ह्यांना सतर्कतेचा इशारा देण्यात आला आहे. नागपुरात सकाळपासून सुरू असलेल्या पावसामुळे अनेक घरांमध्ये पाणी शिरले आहे. पाणी साचण्याच्या या समस्येने स्थानिक नागरिक हैराण झाले आहेत
मुंबईत सकाळपासून मुसळधार पाऊस सुरू आहे.मुंबईतील अनेक भागात पावसाची संततधार सुरू आहे. पावसामुळे अंधेरी सबवे हळूहळू पाण्याने भरत आहे. अशा परिस्थितीत खबरदारी म्हणून अंधेरी सबवे बंद करण्यात आला आहे. मुंबईत आज मुसळधार पावसाचा इशारा हवामान खात्याने जारी केला आहे. हवामान खात्याच्या म्हणण्यानुसार मुंबईच्या विविध भागात मुसळधार पाऊस पडण्याची शक्यता आहे. 19 जुलै रोजी सकाळी 8 ते 20 जुलै रोजी सकाळी 8 वाजेपर्यंतच्या 24 तासांत मुंबई शहरात सरासरी 91 मिमी पावसाची नोंद झाली आहे. पूर्व उपनगरात 87 मिमी, तर पश्चिम उपनगरात 93 मिमी पावसाची नोंद झाली आहे.
याशिवाय मुंबईतही हाय टायड अलर्ट जारी करण्यात आला आहे. हवामान खात्याने दिलेल्या माहितीनुसार, सकाळी 11:28 वाजता 4.24 मीटर उंचीच्या भरतीचा इशारा देण्यात आला आहे. याशिवाय 23:18 वाजता 3.66 मीटर उंचीची भरतीओहोटी येऊ शकते. कमी भरतीबद्दल बोलायचे झाल्यास, 17:33 वाजता 2.02 मीटर उंचीच्या लाटा उसळू शकतात, तर उद्या सकाळी 05:14 वाजता 0.50 मीटर उंचीच्या लाटा उसळण्याची शक्यता आहे.
