नागपूरच्या अनेक भागात दिवसभर ढगाळ वातावरण राहिल्याने सायंकाळी पाऊस झाला. दिवसभरातील दमटपणानंतर पावसाने वातावरणात गारवा निर्माण केला. सायंकाळी नागपुरात अनेक ठिकाणी पाऊस झाला. येत्या 24तासांत ढगांच्या गडगडाटासह पावसाची शक्यताही वर्तवण्यात आली आहे.
भारतीय हवामान खात्याने विदर्भासह राज्यात पावसाचा इशारा दिला असून पुढील दोन दिवस विदर्भात पावसाचा ‘यलो अलर्ट’ जारी केला आहे. येत्या दोन दिवसांत आकाश निरभ्र होईल, त्यामुळे अचानक थंडी वाढण्याचा इशारा देण्यात आला आहे.
हवामान खात्याच्या म्हणण्यानुसार, 30 डिसेंबरपासून विदर्भात कडाक्याच्या थंडीमुळे लोकांच्या दैनंदिन व्यवहारात बदल होऊ शकतो. सकाळी दाट धुके पडण्याची शक्यता नाकारता येत नाही. 29 डिसेंबरला विदर्भातील काही भागात हवामान स्थिर राहील आणि 30 डिसेंबरपासून थंडी वाढेल.
या हवामान स्थितीनुसार शेतकऱ्यांनी नियोजन करावे, असे आवाहन करण्यात आले आहे. पाऊस, गारपीट आणि वारा यांपासून प्राणी आणि कापणी केलेल्या पिकांचे संरक्षण करा. वादळ आल्यास झाडाखाली, मोकळ्या जागेत, टिनाच्या शेडखाली, विजेच्या तारांखाली किंवा वीज तारांजवळ आसरा घेऊ नका, असे आवाहन कृषी विभागाने केले आहे.
28 डिसेंबरपर्यंत विदर्भात गारपीट आणि मेघगर्जनेसह पाऊस पडेल, असा अंदाज हवामान खात्याने वर्तवला आहे. यासोबतच पश्चिम विदर्भात बुलढाणा, अकोला, वाशीम, अमरावती, छत्रपती संभाजीनगर, जालना, परभणी, हिंगोली आणि बीड जिल्ह्यांसह येत्या 24 तासांत वादळाचा इशारा देण्यात आला आहे. या भागांमध्ये काही प्रमाणात गारपीट होण्याचीही शक्यता आहे. 28 डिसेंबरच्या सकाळपर्यंत वादळी पाऊस पूर्वेकडे सरकेल आणि विदर्भातील इतर जिल्ह्यांनाही त्याचा फटका बसू शकतो. त्यात यवतमाळ, वर्धा, नागपूर, भंडारा, गोंदिया आणि चंद्रपूर जिल्ह्यांचा समावेश आहे.
