'वायएसआर काँग्रेस'च्या आमदार शोभा रेड्डी यांचा गुरूवारी एका अपघातात मृत्यू झाला. प्रचारसभा आटोपून येत असताना हैदराबादमध्ये त्यांच्या कारला अपघात झाला. एक वळणावर त्यांच्या कारला भीषण अपघात झाला. शोभा रेड्डी कारमधून बाहेर फेकल्या गेल्या. त्यांना गंभीर दुखाबत झाली. त्यांना तातडीने रुग्णालयात हलविण्यात आले. मात्र उपचार सुरु असताना त्याची प्राणज्योत मालवली.
रेड्डी या करनूल जिल्ह्यातील अलागड्डा येथील आमदार होत्या. त्या ठिकाणाहून त्या चारवेळा निवडून आल्या होत्या. 1996 मध्ये राजकारणात प्रवेश करणार्‍या रेड्डी यांच्यापश्चात तीन मुले आहेत. यापूर्वी त्यांनी तेलगू देसम पार्टी (टीडीपी) व चिरंजीवी यांच्या प्रजा राज्यम पक्षाबरोबरही काम केले आहे. रेड्डी यांच्या निधनाचे वृत्त कळताच वायएसआर काँग्रेसचे प्रमुख जगनमोहन रेड्डी, त्यांची आई विजयम्मा आणि बहिण शर्मिला यांनी आपले दौरे रद्द केले आहेत. सगळे त्यांच्या कुटुंबियांच्या दुःखात सहभागी झाले आहेत.