युगांडाच्या संसदेजवळ सीरियल बॉम्बस्फोट, भारतीय संघ 100 मीटर दूर होता

आफ्रिकन देश युगांडा सीरियल ब्लास्टने हादरले. युगांडाची राजधानी कंपालामध्ये संसद भवनाजवळ झालेल्या स्फोटात दोन जण ठार झाले. भारतीय पॅरा बॅडमिंटन संघ स्फोटाच्या ठिकाणापासून केवळ 100 मीटर अंतरावर तैनात होता. मात्र, या स्फोटात भारतीय संघाचे कोणतेही नुकसान झाले नाही. भारतीय पॅरा बॅडमिंटन संघ काही दिवसांपूर्वीच पॅरा बॅडमिंटन इंटरनॅशनल-2021 मध्ये सहभागी होण्यासाठी युगांडा येथे पोहोचला आहे. या संघात टोकियो पॅरालिम्पिक-2021 मधील पदक विजेते प्रमोद भगत, मनोज सरकार आणि इतर खेळाडूंचा समावेश आहे. 

इमारतीला लक्ष्य करून स्फोट घडवला

प्रत्यक्षदर्शींनी दिलेल्या माहितीनुसार, यातील एक स्फोट पोलीस ठाण्याजवळ झाला आणि दुसरा स्फोट संसद भवनाजवळ रस्त्याच्या कडेला झाला. त्यांच्या म्हणण्यानुसार, संसदेजवळील स्फोट हा विमा कंपनीचे कार्यालय असलेल्या इमारतीला लक्ष्य करून करण्यात आला असावा. स्फोटामुळे तेथे उभ्या असलेल्या वाहनांना आग लागली. नॅशनल ब्रॉडकास्टर यूबीसीच्या म्हणण्यानुसार, काही खासदार जवळच्या संसद भवनाचे संकुल रिकामे करताना दिसले.

सातत्याने स्फोट होत आहेत

त्याच वेळी, दुसऱ्या जागेजवळ उपस्थित असलेल्या एका प्रत्यक्षदर्शीने ऑनलाइन पोस्ट केलेल्या व्हिडिओमध्ये पोलिस स्टेशनजवळ धूर निघताना दिसत आहे. पोलिसांनी लगेच भाष्य केले नाही आणि स्फोट बॉम्बमुळे झाला की अन्य कोणत्या मार्गाने झाला हे स्पष्ट झालेले नाही. युगांडाचे अधिकारी अलीकडच्या आठवड्यात झालेल्या बॉम्बस्फोटांच्या मालिकेच्या पार्श्वभूमीवर लोकांना सावधगिरी बाळगण्याचे आवाहन करत आहेत. 23 ऑक्टोबर रोजी कंपाला येथील रेस्टॉरंटमध्ये झालेल्या स्फोटात एकाचा मृत्यू झाला होता आणि किमान सात जण जखमी झाले होते.

या संस्थेने जबाबदारी घेतली

पोलिसांनी दिलेल्या माहितीनुसार, २३ ऑक्टोबर रोजी झालेल्या बॉम्बस्फोटानंतर दोन दिवसांनी प्रवासी बसमध्ये झालेल्या स्फोटात एक आत्मघाती हल्लेखोर ठार झाला होता. मध्य आफ्रिकेतील इस्लामिक स्टेट गटाशी संलग्न असलेल्या अलायड डेमोक्रॅटिक फोर्सेसने रेस्टॉरंटवरील हल्ल्याची जबाबदारी स्वीकारली आहे.