अहमदाबादच्या नरेंद्र मोदी स्टेडियमवर रविवारी (29 मे) आयपीएलचा अंतिम सामना झाला. विजेतेपदाच्या लढतीत गुजरात टायटन्सने राजस्थान रॉयल्सचा पराभव करून प्रथमच विजेतेपद पटकावले. या सामन्यासह दोन महिन्यांहून अधिक काळ सुरू असलेली ही स्पर्धा संपुष्टात आली. आयपीएल संपल्यानंतर भारतीय क्रिकेट नियामक मंडळाने (बीसीसीआय) क्युरेटर्स आणि ग्राउंड्समनसाठी खजिना खुला केला आहे.
बीसीसीआयचे सचिव जय शाह यांनी सोमवारी (30 मे) ट्विट करून बोर्ड क्युरेटर आणि ग्राउंड्समनला 1.25 कोटी रुपये बक्षीस म्हणून देणार असल्याची माहिती दिली. सहा स्टेडियमसाठी वेगळी बक्षीस रक्कम आहे. जय शाह यांनी आपल्या दुसऱ्या ट्विटमध्ये सांगितले की, मुंबईतील क्रिकेट क्लब ऑफ इंडिया (ब्रेबॉर्न स्टेडियम), वानखेडे स्टेडियम, डीवाय पाटील स्टेडियम आणि पुण्याच्या महाराष्ट्र क्रिकेट असोसिएशन स्टेडियमला 25-25 लाख रुपये दिले जातील. त्याचबरोबर कोलकाता येथील ईडन गार्डन्स आणि अहमदाबादच्या नरेंद्र मोदी स्टेडियमला 12.5-12.5 लाख रुपये मिळतील.
साखळी फेरीतील 70 सामने महाराष्ट्रातील चार स्टेडियममध्ये खेळवण्यात आले. वानखेडे आणि डीवाय पाटील स्टेडियमवर 20-20 सामने झाले. त्याच वेळी, ब्रेबॉर्न आणि एमसीएमध्ये 15-15 सामने झाले. त्यानंतर प्लेऑफचे दोन सामने कोलकात्याच्या ईडन गार्डन्सवर आणि दोन सामने अहमदाबादच्या नरेंद्र मोदी स्टेडियमवर झाले.
अंतिम फेरीत हार्दिक पांड्याच्या नेतृत्वाखालील गुजरात संघाने राजस्थानच्या १३१ धावांच्या लक्ष्याचा यशस्वी पाठलाग करत 18.1षटकांत विजयाची नोंद केली. गुजरातकडून शुभमन गिलने 43 चेंडूत 45 धावा केल्या. पण संघाचा कर्णधार हार्दिक पंड्याने अष्टपैलू कामगिरी करत 30 चेंडूत 34 धावा केल्या आणि तीन बळीही घेतले. राजस्थानच्या जोस बटलरने स्पर्धेत सर्वाधिक धावा आणि युझवेंद्र चहलने सर्वाधिक विकेट घेतल्या. बटलरला ऑरेंज कॅप आणि चहलला पर्पल कॅप देण्यात आली.