आयपीएल 2024 मधील 'सुपर संडे'च्या दुसऱ्या सामन्यात रविवारी चेन्नई सुपर किंग्जने मुंबई इंडियन्सचा 2धावांनी पराभव केला. या विजयासह चेन्नईचा संघ आठ गुणांसह गुणतालिकेत दुसऱ्या स्थानावर कायम आहे. तर मुंबईचा संघ आठव्या स्थानावर आहे. या सामन्यात मनोरंजनाचा पुरेपूर डोस होता. एकीकडे महेंद्रसिंग धोनीने सलग तीन षटकार ठोकले, तर दुसरीकडे 'मुंबई चा राजा' म्हणून प्रसिद्ध असलेल्या रोहित शर्माने नाबाद शतक झळकावले. या खेळीत त्याने अनेक विक्रमही केले. मात्र, तो आपल्या संघाला विजयापर्यंत नेऊ शकला नाही.
रोहितने 63 चेंडूत 11 चौकार आणि पाच षटकारांच्या मदतीने 105 धावांची खेळी केली. सामन्यादरम्यान तिसरा षटकार मारत त्याने टी-20 क्रिकेटमध्ये 500 षटकारही पूर्ण केले. अशी कामगिरी करणारा तो भारताचा पहिला आणि जगातील पाचवा खेळाडू ठरला. रोहितच्या नावावर सध्या टी-20 क्रिकेटमधील 419 डावांमध्ये 502 षटकार आहेत. यापैकी त्याने आयपीएलमध्ये 272 षटकार मारले आहेत.
त्याच्या आधी ख्रिस गेल, किरॉन पोलार्ड, आंद्रे रसेल आणि कॉलिन मुनरो यांनी ही कामगिरी केली आहे. गेलच्या नावावर 455 टी-20 डावात 1056 षटकार होते. त्याने वानखेडेवर आयपीएलमधील पहिले शतक झळकावले. यापूर्वी 2012 मध्ये हिटमॅनने कोलकाता नाईट रायडर्सविरुद्ध ईडन गार्डन्सवर 109 धावांची नाबाद खेळी खेळली होती. त्याचवेळी मुंबई इंडियन्सकडून आयपीएलमधील हे सातवे शतक ठरले. आयपीएलमध्ये एकापेक्षा जास्त शतके झळकावणारा रोहित हा मुंबईचा एकमेव फलंदाज आहे. त्याच्याशिवाय सनथ जयसूर्या, सचिन तेंडुलकर, लेंडल सिमन्स आणि कॅमरून ग्रीन यांनी प्रत्येकी एक शतक झळकावले आहे.