आपल्याला काळ्या बटणांचा संगणकाचा की-बोर्ड माहीत आहे. वायरलेस की बोर्डबद्दलही आपण ऐकलंय. पण आता वेगवेगळ्या तंत्रज्ञानावर आधारित की-बोर्डस् बाजारात दाखल झाले आहेत. ब्लूटूथ, यूएसबी, एचडीएमआय कनेक्टिव्हिटीवाल्या की-बोर्डस्ची सध्या चांगलीच चलती आहे. त्यातच आता लेझर तंत्रज्ञानावर आधारित की-बोर्डही तयार करण्यात आले आहेत. लेझर लाईटवर चालणारे हे की-बोर्ड पाहिल्यावर कुणालाही आश्चर्य वाटल्याशिवाय राहणार नाही. लेझर प्रोजेक्शन व्हच्यरुअल की-बोर्ड असं याचं नाव आहे.
दोस्तांनो, लेझरवर चालणारा की-बोर्ड प्रत्यक्षात नसतोच. लेझर लाईटच्या मदतीनं एक व्हच्यरुअल म्हणजेच आभासी की-बोर्ड तयार केला जातो. या की-बोर्डवर तुम्हाला काम करायचं आहे. आहे ना गंमत! लेझरमधून बाहेर पडणार्‍या लाल रंगाच्या किरणांनी हायटेक की-बोर्ड तयार होतो.
प्रत्यक्षात अस्तित्वात नसलेला असा की-बोर्ड वापरणं हा खूपच गमतीशीर अनुभव असेल. अनेक कंपन्यांनी अशा प्रकारचे की-बोर्डस् बाजारात उतरवले आहेत. आयफोन, आयपॅड, स्मार्टफोन, टॅबलेट किंवा इतर कोणत्याही ब्लू टूथ डिव्हाइसवर काम करण्यासाठी या की-बोर्डचा वापर करता येईल. हा की-बोर्ड बॅटरीवर चालतो. ऑन केल्यानंतर त्यातून लाल रंगाची लेझर किरणं बाहेर पडतात. त्या किरणांपासून एक की-बोर्ड तयार होतो. हा आपल्या नेहमीच्या की- बोर्डसारखाच असतो. टाईप केल्यानंतर यातून बीप असा आवाज येतो. पण हा की-बोर्ड वापरण्यासाठी सपाट पृष्ठभाग असणं गरजेचं आहे.