उत्तर प्रदेशातील राज्यसभा निवडणुकीसाठी भाजपने सात उमेदवारांची घोषणा केली आहे. भाजपने पक्षाचे राष्ट्रीय प्रवक्ते सुधांशू त्रिवेदी, यूपीए सरकारमध्ये मंत्री असलेले आरपीएन सिंग आणि काँग्रेस सोडून भाजपमध्ये प्रवेश केलेले आणि पक्षाचे प्रदेश सरचिटणीस अमरपाल मौर्य यांना उमेदवारी दिली आहे. आग्राचे माजी महापौर नवीन जैन, गाझीपूर सदरच्या माजी भाजप आमदार संगीता बलवंत बिंद, मुगलसरायच्या माजी भाजप आमदार साधना सिंह आणि मथुराचे माजी खासदार तेजवीर सिंह यांनाही उमेदवारी देण्यात आली आहे. विधानसभेतील भाजपच्या सदस्यांची संख्या लक्षात घेता हे सातही उमेदवार राज्यसभेच्या सदस्यपदी निवडून येणे निश्चित आहे.
लोकसभा निवडणुकीच्या पार्श्वभूमीवर जातीय समीकरणे निर्माण करण्यासाठी भाजपने यूपीच्या विद्यमान नऊपैकी आठ राज्यसभा सदस्यांची तिकिटे रद्द केली आहेत. विद्यमान सदस्यांमधून केवळ सुधांशू त्रिवेदी यांनाच दुसरी संधी देण्यात आली आहे. तर अनिल डॉ.अनिल अग्रवाल, डॉ.अशोक बाजपेयी, डॉ.अनिल जैन, कांता कर्दम, सकलदीप राजभर, जीव्हीएल नरसिंह राव, हरनाथ सिंह यादव आणि विजयपाल सिंह तोमर यांची तिकिटे रद्द करण्यात आली आहेत.
याशिवाय बिहारमधून पक्षाच्या धरमशीला गुप्ता आणि डॉ भीम सिंह यांना उमेदवारी देण्यात आली आहे. या यादीत पक्षाने छत्तीसगडमधून राजा देवेंद्र प्रताप सिंह, हरियाणातून सुभाष बराला, कर्नाटकातून नारायण कृष्णसा भांडगे यांना उमेदवारी दिली आहे. उत्तराखंडमधून महेंद्र भट्ट आणि पश्चिम बंगालमधून समिक भट्टाचार्य यांना उमेदवारी देण्यात आली आहे.