असे होणार आहे मूक आंदोलन

मराठा आरक्षणावरुन खासदार संभाजीराजे यांनी ६ जून रोजी राजसदरेवरुन आंदोलनाची हाक दिली होती. १६ जूनला कोल्हापुरातून मूक आंदोलनाची सुरुवात होईल अशी घोषणा संभाजीराजे यांनी केली होती. या मूक आंदोलनाच्या पार्श्वभूमीवर या आंदोलनाची भूमिका आणि दिशा संभाजीराजे यांनी स्पष्ट केली आहे. 

 आरक्षण देण्याची जबाबदारी सर्व आमदार, खासदारांची आहे. उद्याच्या आंदोलनाचं सर्व लोकप्रतनिधींना निमंत्रण दिलं आहे. लोकप्रतिनिधींचा आदर राखून आंदोलन करा, त्यांच्यासोबत वाद घालू नका, असं आवाहन संभाजीराजे यांनी केलं.

आंदोलनात सहभागी होणाऱ्यांनी कुणालाही उलटसूलट बोलू नये. आंदोलनात सहभागी होणाऱ्यांना सोशल डिस्टन्सिंगचं पालन करण्याचं आवाहन संभाजीराजे यांनी केलं. अतिशय शांततेमध्ये आंदोलन करायचं असून आंदोलनाची सुरुवात करण्याचा मान कोल्हापूरला असल्याचं देखील संभाजीराजे म्हणाले.