Team India ICC Test Ranking:आंतरराष्ट्रीय क्रिकेट परिषदेने (ICC) कसोटी संघाची नवीनतम क्रमवारी जाहीर केली आहे. या कसोटी क्रमवारीत टीम इंडियाला मोठा फायदा झाला आहे. भारताने बांगलादेशविरुद्ध 2 कसोटी सामन्यांची मालिका जिंकली होती, ज्यामुळे टीम इंडिया ताज्या ICC कसोटी क्रमवारीत नंबर 1 संघ बनला आहे. टीम इंडियापूर्वी ऑस्ट्रेलिया पहिल्या क्रमांकावर होता. ताज्या क्रमवारीत भारत 3690 गुणांसह पहिल्या क्रमांकावर आला आहे.
T20 नंतर कसोटीत नंबर-1
सध्या भारतीय संघ टी-20 तसेच कसोटीतही नंबर-1 बनला आहे. त्याचबरोबर टीम इंडिया सध्या वनडे क्रमवारीत चौथ्या क्रमांकावर आहे. आंतरराष्ट्रीय क्रिकेट परिषदेच्या ताज्या कसोटी क्रमवारीत टीम इंडिया 3,690 गुण आणि 115 रेटिंगसह नंबर वन बनली आहे. ऑस्ट्रेलियन संघ 3,231 गुण आणि 111 रेटिंगसह दुसऱ्या क्रमांकावर आहे. याशिवाय इंग्लंड 106 गुणांसह तिसऱ्या तर न्यूझीलंड 100 गुणांसह चौथ्या स्थानावर आहे.
वनडे रँकिंगमध्येही नंबर-1 होण्याची संधी
भारत आणि न्यूझीलंड यांच्यातील एकदिवसीय मालिकेची सुरुवात 18 जानेवारी रोजी हैदराबाद येथे होणार्‍या सामन्याने होणार आहे. या मालिकेत टीम इंडियाने न्यूझीलंडला 3-0 ने पराभूत केले तर आयसीसी वनडे क्रमवारीत नंबर वन होण्याची सुवर्णसंधी असेल. सध्या वनडे क्रमवारीत न्यूझीलंडचा संघ 117 गुणांसह पहिल्या क्रमांकावर आहे, तर टीम इंडिया 110 गुणांसह चौथ्या क्रमांकावर आहे. टीम इंडियाने या मालिकेत क्लीन स्वीप केल्यास त्याचे 114 गुण होतील आणि न्यूझीलंडचा संघ 111 गुणांवर घसरेल.
बांगलादेश संघाचा 2-0 ने पराभव केला
टीम इंडियाने शेवटची कसोटी मालिका बांगलादेश संघाविरुद्ध खेळली. या मालिकेत टीम इंडियाने बांगलादेशचा 2-0 असा पराभव केला. कर्णधार रोहित शर्माच्या अनुपस्थितीत केएल राहुलने या मालिकेत टीम इंडियाची कमान सांभाळली. टीम इंडिया आता ऑस्ट्रेलियाविरुद्ध पुढील कसोटी मालिका खेळणार आहे. जर टीम इंडियाने ही मालिकाही जिंकली तर ते वर्ल्ड टेस्ट चॅम्पियनशिप 2023 च्या अंतिम फेरीतही आपले स्थान निश्चित करेल.
Edited by : Smita Joshi