बाबा सिद्दीकी हत्येप्रकरणी 26 वी अटक, शूटर्सना ऑनलाइन पैसे ट्रान्सफर करणाऱ्याला अकोल्यातून अटक

Baba Siddique murder case : महाराष्ट्राचे माजी मंत्री बाबा सिद्दीकीच्या हत्येप्रकरणी शुक्रवारी अकोला जिल्ह्यातून एका व्यक्तीला अटक करण्यात आली. राष्ट्रवादी काँग्रेसचे (NCP) नेते सिद्दीकी यांची 12 ऑक्टोबर रोजी वांद्रे पूर्वेतील निर्मल नगर भागात आमदार पुत्र जीशान सिद्दीकी यांच्या कार्यालयाजवळ हल्लेखोरांनी गोळ्या झाडून हत्या केली होती. काही वेळाने जवळच्या रुग्णालयात सिद्दीकी यांचा मृत्यू झाला.

अधिकाऱ्याने सांगितले की, तपासासंदर्भात नागपूरला गेलेल्या गुन्हे शाखेच्या पथकाने सुमित दिनकर वाघ (26, रा. पणज, अकोट तहसील) याला अटक केली. या प्रकरणातील ही 26वी अटक असल्याचे त्यांनी सांगितले.

वाघ याने गुजरातमधील आनंद जिल्ह्यातील कर्नाटक बँकेच्या पेटलाड शाखेतील एका खात्यातून अटक आरोपी गुरमेल सिंगचा भाऊ नरेशकुमार, तसेच अटक आरोपी रुपेश मोहोळ आणि हरीशकुमार यांना पैसे हस्तांतरित केले होते. अटक आरोपी सलमान व्होराच्या नावाने खरेदी केलेले सिम वापरून त्याने ऑनलाइन पैसे ट्रान्सफर केले.

वॉन्टेड आरोपी शुभम लोणकर याच्या सूचनेवरून ही रक्कम हस्तांतरित करण्यात आल्याचे अधिकाऱ्याने सांगितले. लोणकर हा देखील वाघ याच तालुक्याचा रहिवासी असून दोघेही जिवलग मित्र आहेत. ते अकोट येथील महाविद्यालयीन सोबती होते. पेटलाड, आनंद येथील सलमान व्होरा याला नुकतेच बाळापूर, अकोला येथून पकडण्यात आले