Mumbai Pod Taxi मुंबईत धावणार पॉड टॅक्सी, वाहतुकीची समस्या सुटेल! भाडे आणि रुट जाणून घ्या

येत्या काही वर्षांत मुंबईत पॉड टॅक्सी सेवा सुरू होणार आहे. होळीपूर्वी महाराष्ट्र सरकारने मुंबईकरांना मोठी भेट दिली आहे. शहरवासीयांचा प्रवास सुखकर करण्यासाठी आणखी एक सार्वजनिक वाहतूक सेवा सुरू होणार आहे. राज्य सरकारने मुंबईतील वांद्रे-कुर्ला कॉम्प्लेक्स (BKC) मध्ये पॉड टॅक्सी सेवा चालवण्याची घोषणा केली आहे.

पॉड टॅक्सी चालवण्याचा निर्णय एमएमआरडीएच्या (मुंबई महानगर प्रदेश विकास प्राधिकरण) मंगळवारी झालेल्या बैठकीत घेण्यात आला. हा प्रकल्प सार्वजनिक-खासगी भागीदारी तत्त्वावर राबविण्यात येणार आहे. यासाठी 1 हजार 160 कोटी रुपये खर्च केले जातील असा अंदाज आहे. यामुळे बीकेसी परिसरातील वाहतुकीची समस्या तर दूर होईलच शिवाय प्रदूषणही कमी होईल.

ही पॉड टॅक्सी मुंबईच्या बिझनेस हबमध्ये वांद्रे ते कुर्ला दरम्यान धावणार आहे. यासंदर्भात मुख्यमंत्री कार्यालयाने प्रसिद्धीपत्रकही जारी केले आहे.

MMRDA ने वांद्रे आणि कुर्ला रेल्वे स्थानकांदरम्यान 8.8 किमी अंतराच्या पॉड टॅक्सी सेवेला मान्यता दिली आहे. निवेदनानुसार, सहा प्रवाशांची क्षमता असलेली पॉड टॅक्सी ताशी 40 किमी वेगाने धावेल. वांद्रे ते कुर्ला स्थानकादरम्यान 38 थांबे असतील.

एमएमआरडीएच्या अधिकाऱ्यांच्या मते, गजबजलेल्या वांद्रे-कुर्ला मार्गावरील पॉड टॅक्सी प्रकल्पासाठी 1016 कोटी रुपये खर्च अपेक्षित आहे.

अधिकाऱ्यांच्या म्हणण्यानुसार, सर्व आवश्यक परवानग्या मिळाल्यानंतर, ॲडव्हान्स्ड रॅपिड ट्रान्झिट सिस्टम तयार करण्यासाठी तीन वर्षे लागतील. मुख्यमंत्री एकनाथ शिंदे यांनी या मार्गावर पॉड टॅक्सीसाठी निविदा काढण्यास मान्यता दिली आहे.

अधिकाऱ्यांनी पुढे सांगितले की, बीकेसीमध्ये दररोज 4 लाखांहून अधिक लोक प्रवास करतात. अहवालानुसार 2031 पर्यंत 1.9 लाख लोक पॉड टॅक्सी सेवेचा वापर करतील अशी अपेक्षा आहे. यासह प्रवासाचा खर्च 21 रुपये प्रति किमी असेल.