राजस्थान पोलिसांनी जयपूर बॉम्बस्फोट मालिकेततील संशयित पंचवीस वर्षीय युवकाचे रेखाचित्र जारी केले आहे. सायकल दुकानदाराने दिलेल्या वक्तव्यानुसार रेखाचित्र तयार करण्यात आल्याचे पोलिस संचालक पंकज सिंग यांनी सांगितले.
दहशतवाद्यांनी स्फोटकांच्या साहाय्याने स्फोट घडवून आणण्यासाठी येथून विकत घेतलेल्या सायकलचा उपयोग केला होता.सर्व महत्त्वाच्या ठिकाणी रेखाचित्र लावण्यात येईल, असे गृहमंत्री गुलाबचंद कटारीया यांनी सांगितले. बॉम्बस्फोट घडवून आणण्यात नऊ पेक्षा कमी किंवा जास्त दहशतवाद्यांच्या पथकांचा समावेश असू शकतो.
दहशतवाद्यांनी सायकल विकत घेतलेली दोन दुकाने ओळखण्यात आली आहे. स्फोटाच्या पंचेचाळीस मिनिट अगोदर एका महिलेने नवीन सायकल विकत घेण्यास जाण्यासाठी आपणाकडे विचारणा केल्याचा दावा रिक्षावाल्याने केल्याने त्याचीही चौकशी करण्यात येत आहे.
तो जखमी झाला असून रूग्णालयात उपचार घेत आहे. बॉम्बस्फोटाची सूत्रधार संघटना कोणती याबाबत अद्याप सांगणे शक्य नसल्याचे गृहमंत्र्यांनी स्पष्ट केले.