एका धक्कादायक घटनेत दिल्लीत एका मुलीच्या निर्घृण हत्येचा व्हिडिओ समोर आला आहे. शहाबाद परिसरात एका 16 वर्षीय अल्पवयीन मुलीची घराबाहेर हत्या करण्यात आली. रविवारी रोजी घडलेल्या या घटनेचे सीसीटीव्ही व्हिडिओ फुटेजही समोर आले आहे. माहितीनुसार साक्षी असे मृत तरुणीचे नाव आहे. रोहिणी येथील शाहाबाद डेअरीजवळ 20 वर्षीय साहिल नावाच्या तरुणाने तिच्यावर 40 वार केले. यानंतर तिला दगडाने ठेचून मारण्यात आले.
आश्‍चर्यकारक गोष्ट म्हणजे ही क्रूरता घडत असताना रस्त्यावरून जाणारे सर्व काही पाहत होते आणि कोणीही हस्तक्षेप करायला आले नाही. ज्या ठिकाणी मुलीवर चाकूने वार केले जात आहेत त्या ठिकाणाहून लोक जातानाही दिसत आहेत. पण कोणीही हस्तक्षेप केला नाही.
साहिलने आधी साक्षीवर चाकूने हल्ला केला, नंतर तिचे डोके दगडाने ठेचले, असे व्हिडिओमध्ये दिसत आहे. आरोपी आणि मृताचे नातेसंबंध असल्याचे सांगण्यात येत आहे. ही घटना घडली तेव्हा साक्षी तिची मैत्रिण नीतूच्या मुलाच्या वाढदिवसाच्या पार्टीत सहभागी होण्यासाठी जात होती.
त्यानंतर अचानक साहिल आला आणि त्याने ही घटना घडवून आणली. घटनेच्या एक दिवस आधी साहिल आणि साक्षी यांच्यात कडाक्याचे भांडणही झाले होते. या प्रकरणी दिल्ली पोलिसांनी हत्येच्या कलमाखाली एफआयआर दाखल केला आहे. याप्रकरणी शाहबाद डेअरी पोलिस ठाण्यात गुन्हा दाखल करण्यात आला आहे. याप्रकरणी मृताच्या वडिलांनी फिर्याद दिली. या प्रकरणाच्या तपासासोबतच आरोपींना पकडण्यासाठी पोलिसांकडून प्रयत्न सुरू आहेत. या घटनेची माहिती मिळताच लोकांना धक्का बसला आहे.
DCW प्रमुख स्वाती मालीवाल यांनी सांगितले की, 16 वर्षीय मुलीवर 40-50 वेळा वार करण्यात आले आणि नंतर दगडाने अनेक वेळा वार करण्यात आले, त्यानंतर तिचा मृत्यू झाला. हा सर्व प्रकार सीसीटीव्हीत कैद झाला आहे. तेथील अनेकांनी ही घटना पाहिली, पण त्यांनी काहीच केले नाही. दिल्लीत महिला आणि मुली अत्यंत असुरक्षित आहेत. मी एमएचए, दिल्ली एलजी, डीसीडब्ल्यू प्रमुख आणि दिल्लीच्या मुख्यमंत्र्यांसोबत उच्चस्तरीय बैठक बोलावण्याचे आवाहन करते.