हिजाब वादाबाबत कर्नाटक उच्च न्यायालयाने दिलेल्या निर्णयाचा निषेधही सुरू झाला आहे. हिजाबबाबत कर्नाटक उच्च न्यायालयाच्या निर्णयामुळे संतप्त झालेल्या मुस्लिम समाजाच्या नेत्यांनी गुरुवारी कर्नाटक बंदची हाक दिली आहे. बुधवारी कर्नाटकातील भटकळमध्ये मुस्लिम समुदायांनी आपली दुकाने बंद ठेवली होती. शहरातील बहुतांश दुकानांचे शटर दिवसभर बंद होते. भटकळ हे उडुपीपासून ९० किमी अंतरावर असलेले शहर आहे.
या भागातील प्रसिद्ध डॉक्टर हनिफ शोबाब यांनी सांगितले की, मुस्लिम समाजातील लोकांनी स्वेच्छेने एक दिवस दुकाने बंद ठेवली आहेत. कर्नाटक उच्च न्यायालयाने मंगळवारी हिजाब प्रकरणी निकाल देताना सांगितले की, इस्लाममध्ये आवश्यक असलेल्या धार्मिक प्रथेचा तो भाग नाही. उच्च न्यायालयाच्या तीन न्यायाधीशांच्या खंडपीठाने हा निर्णय दिला. यासोबतच न्यायालयाने हिजाबच्या वादात झालेल्या निदर्शनांचा जलद आणि प्रभावी तपास करण्याचेही समर्थन केले.
हिजाब हा धार्मिक प्रथेचा भाग असेलच असे नाही
न्यायालयाने निकाल देताना असे निरीक्षण नोंदवले की, मुस्लिम महिलांनी हिजाब घालणे हा इस्लामनुसार आवश्यक असलेल्या धार्मिक प्रथेचा भाग नाही आणि शालेय गणवेश विहित करणे हे केवळ एक वाजवी निर्बंध आहे, ज्यावर विद्यार्थी आक्षेप घेऊ शकत नाहीत. यासंदर्भात आदेश देण्याचा अधिकार राज्य सरकारला आहे, असेही खंडपीठाने स्पष्ट केले.
मुस्लीम समाजातील मौलवींसोबत बैठक होणार
संपूर्ण राज्य व्यापारी मंडळालाही उद्याच्या बंदमध्ये सहभागी होण्याचे निर्देश देण्यात आले आहेत. मुस्लिम नेते सगीर अहमद यांनी बुधवारी जाहीर केले की ते उद्या मुस्लिम समाजातील मौलवींची बैठक घेणार आहेत. बंदसाठी कोणावरही जबरदस्ती करण्याची गरज नसल्याचे ते म्हणाले.