केरळमधील कोची येथील कलामासेरी येथील जामरा इंटरनॅशनल कन्व्हेन्शन सेंटरमध्ये स्फोट झाला आहे. या स्फोटात एकाचा मृत्यू झाला असून 20 हून अधिक लोक जखमी झाले आहेत. कन्व्हेन्शन सेंटरमध्ये सकाळी 9.40 वाजता हा स्फोट झाला. स्फोट झाला तेव्हा कन्व्हेन्शन सेंटरमध्ये सार्वजनिक कार्यक्रम सुरू होता. स्फोटानंतर घटनास्थळी एकच गोंधळ उडाला. पोलिसांनी जखमींना रुग्णालयात दाखल केले आहे. पाच जखमींची प्रकृती चिंताजनक आहे.
प्रत्यक्षदर्शींनी दिलेल्या माहितीनुसार, काही मिनिटांतच तीन स्फोट झाले. एका प्रत्यक्षदर्शीने दिलेल्या माहितीनुसार, प्रार्थना संपल्यानंतर काही सेकंदात हा स्फोट झाला. पहिला स्फोट हॉलच्या मध्यभागी झाला. काही सेकंदांनंतर, हॉलच्या दोन्ही बाजूला एकाच वेळी आणखी दोन स्फोट झाले.
कन्व्हेन्शन सेंटरमधील तीन दिवसीय परिषद 27 जुलैपासून सुरू झाली आणि रविवारी दुपारपर्यंत संपणार होती. एका अंदाजानुसार, सुमारे 2300 लोकांनी या कार्यक्रमात सहभागी होण्यासाठी नोंदणी केली होती.
या तीन दिवसीय प्रार्थना सभेचा रविवारी शेवटचा दिवस असल्याचे सांगण्यात आले. अधिकाऱ्यांनी दिलेल्या माहितीनुसार, स्फोट झाला तेव्हा प्रार्थना सभेत सुमारे दोन हजार लोक जमले होते. केरळच्या आरोग्य मंत्री वीणा जॉर्ज के यांनी सांगितले की, त्यांनी कलामासेरी स्फोटाबाबत सर्व रुग्णालयांना सतर्क केले आहे. तसेच रजेवर गेलेल्या सर्व आरोग्य कर्मचाऱ्यांना तातडीने कामावर रुजू होण्यास सांगण्यात आले आहे.
