Omicron in Gujarat: गुजरातमध्ये महिला आरोग्य कर्मचारी ओमिक्रॉन पॉझिटिव्ह, बाधितांची संख्या 5 झाली

मेहसाणा: भारतातील कोविड-19 चे नवीन प्रकार असलेल्या ओमिक्रॉनच्या प्रकरणांमध्ये झपाट्याने वाढ होत आहे. गुरुवारी, राष्ट्रीय राजधानी दिल्लीतून ओमिक्रॉनची चार नवीन प्रकरणे नोंदवल्यानंतर (Delhi Omicron Update), गुजरातमध्येही या प्रकाराचे एक नवीन प्रकरण समोर आले आहे. गुजरातमधील मेहसाणा येथे एक महिला आरोग्य कर्मचारी ओमिक्रॉन चाचणीत पॉझिटिव्ह आढळून आली आहे. अधिकाऱ्यांनी दिलेल्या माहितीनुसार, महिला आरोग्य सेविका मेहसाणा जिल्ह्यातील विजापूर तालुक्यातील एका गावातील रहिवासी आहे. गुजरातमधील ओमिक्रॉनचे हे पाचवे प्रकरण आहे.

मिळालेल्या माहितीनुसार, ओमिक्रॉनची लागण झालेली महिला 41 वर्षांची असून ती मान्यताप्राप्त सामाजिक आरोग्य सेवक (आशा वर्कर) आहे. जिल्हा आरोग्य अधिकारी डॉ.विष्णुभाई पटेल म्हणाले की, आशा कार्यकर्त्याचा परदेश प्रवासाचा इतिहास नाही. मात्र, काही दिवसांपूर्वीच झिम्बाब्वेहून परतलेल्या महिलेचे काही नातेवाईक येथे आल्याचे समोर आले आहे.

आयसोलेट करण्यात आली संक्रमित महिला

जिल्हा आरोग्य अधिकाऱ्याने सांगितले की, ओमिक्रॉनची लागण झालेल्या महिलेवर वडनगर शहरातील सरकारी रुग्णालयात उपचार सुरू असून तिला विलगीकरण कक्षात ठेवण्यात आले आहे. महिलेची प्रकृती स्थिर असल्याचे डॉक्टरांनी सांगितले. पटेल यांनी सांगितले की, नुकतेच त्यांच्या पतीचे कर्करोगाने निधन झाले. महिलेच्या पतीचा मोठा भाऊ आणि त्याची पत्नी शोकसभेत सहभागी होण्यासाठी झिम्बाब्वेहून मेहसाणा येथे आले होते.