शनिवारी जम्मू-काश्मीरच्या उन्हाळी राजधानीच्या रंगपोरा जाकुरा भागात लष्कर-ए-तैयबाच्या दोन दहशतवाद्यांना सुरक्षा दलांनी ठार केले. यातील एक दहशतवादी इखलाक अहमद हजम हा गेल्या29 जानेवारीला अनंतनागमध्ये हेड कॉन्स्टेबलवर झालेल्या हल्ल्याचा मास्टरमाईंड होता. या हल्ल्यात हेड कॉन्स्टेबल अली मोहम्मद शहीद झाले.
सुरक्षा दलांशी झालेल्या चकमकीत इखलाक अहमद हजाम आणि आदिल निसार दार हे दोन दहशतवादी ठार झाल्याचे काश्मीर पोलिसांनी सांगितले. त्यापैकी इखलाक अहमद हजम हा 29 जानेवारी रोजी अनंतनागच्या हसनपोरा येथे हेड कॉन्स्टेबल अली मोहम्मद यांच्यावर झालेल्या हल्ल्याचा सूत्रधार होता.
काश्मीर पोलिसांनी सांगितले की, श्रीनगर पोलिसांकडून शोध मोहीम राबवली जात असताना दहशतवाद्यांनी छुप्या पद्धतीने गोळीबार सुरू केला, त्यानंतर चकमक सुरू झाली. त्यांच्या ताब्यातून घातक साहित्य, शस्त्रे आणि दारूगोळा, दोन पिस्तूल आणि पाच ग्रेनेड जप्त करण्यात आले आहेत. पुढील तपास सुरू आहे.