शोपियानमध्ये झालेल्या चकमकीत लष्कराचे दोन जवान शहीद, एक दहशतवादी ठार

शनिवारी सकाळी शोपियानमध्ये सुरक्षा दल आणि दहशतवाद्यांमध्ये झालेल्या चकमकीत एक दहशतवादी ठार झाला तर लष्कराचे दोन जवान शहीद झाले. काश्मीर झोन पोलिसांच्या वरिष्ठ अधिकाऱ्याने सांगितले की, ही चकमक शोपियानच्या झैनापोरा भागातील चेरमार्ग येथे झाली. या कारवाईत एक दहशतवादी मारला गेला, त्याची ओळख पटू शकली नाही. राष्ट्रीय रायफल्सचे संतोष यादव आणि रोमित चौहान अशी या चकमकीत जवानांची नावे आहेत. सुरक्षा दलांचे ऑपरेशन अजूनही सुरू आहे. या परिसरात आणखी दहशतवादी असण्याची शक्यता आहे. दहशतवाद्यांवर गोळीबार करण्यापूर्वी सुरक्षा दलांनी त्यांना शस्त्रे ठेवण्याची अनेक संधी दिली होती. एका दहशतवाद्याला ठार केल्यानंतरही सुरक्षा कर्मचारी परिसरात लपून बसलेल्या इतर दहशतवाद्यांना आत्मसमर्पण करण्यास सांगत आहेत मात्र सध्या ही कारवाई सुरू आहे.

पोलिसांकडून मिळालेल्या माहितीनुसार, चेरमार्ग, जैनपोरा येथे दहशतवादी दिसल्याची माहिती मिळताच एसओजी, आर्मी आणि सीआरपीएफचे संयुक्त पथक तेथे पोहोचले आणि शोध मोहीम राबवली. सुरक्षा दलाचे पथक संशयित घटनास्थळी पोहोचताच लपलेल्या दहशतवाद्यांनी त्यांच्यावर गोळीबार केला. गोळीबाराला प्रत्युत्तर देताना सुरक्षा दलांनी लपलेल्या दहशतवाद्यांना आत्मसमर्पण करण्यास सांगितले मात्र दहशतवाद्यांनी सुरक्षा दलांवर गोळीबार सुरूच ठेवला.