माळशेज घाटातील दरीत विठ्ठलवाडी -अहमदनगर एसटी बस आज (गुरुवारी) सकाळी साडेदहाच्या सुमारास कोसळून झालेल्या अपघातात 37 प्रवाशांचा मृत्यु झाला आहे. मृतात 19 महिला व 18 पुरूषांचा समावेश आहे. तसेच चालक आणि वाहकाचाही मृत्यु झाला आहे. बसमध्ये 43 प्रवाशी प्रवास करीत होते. जखमीना रुग्णालयात हलवण्यात आले आहे. मृतांचा आकडा वाढण्याची शक्यताही वर्तवण्यात आली आहे.
घाटात एका अज्ञात ट्रकची धडक बसून बस दरीत कोसळ्याचे प्रत्यक्षदर्शीनी पो‍लिसांना सांगितले आहे. कल्याण-डोंबिवली महापालिकेच्या अग्निशमन विभागाचे जवान मदतकार्य करीत आहेत. महाराष्‍ट्र राज्य परिवनहन मंडळातर्फे मृतांच्या नातेवाईकांना प्रत्येक तीन लाख रुपये मदत जाहीर केली आहे. ही माहिती एसटी मंडळाचे जनसंपर्क अधिकारी मुकुंद धस यांनी दिली आहे.
बस 80 फुट उंचीवरून खाली कोसळली. त्यामुळे एसटी बस चकणाचूर झाली आहे. मुरबाडवरुन ही बस अहमदनगरच्या दिशेने जात असताना हा अपघात झाला.