देवगिरी एक्स्प्रेसमध्ये सशस्त्र दरोडा ,प्रवाशांच्या सुरक्षेवर प्रश्नचिन्ह

महाराष्ट्रातील औरंगाबादजवळील दौलताबाद ते पोटुल रेल्वे स्थानकादरम्यान आज (22 एप्रिल, शुक्रवार) रात्री उशिरा ट्रेनमध्ये दरोडा टाकल्याची घटना उघडकीस आली आहे. ही घटना गुरुवारी रात्री 12 ते 1 च्या दरम्यान औरंगाबादहून मुंबईच्या दिशेने येणाऱ्या देवगिरी एक्स्प्रेस गाडीत घडली.

गेल्या काही दिवसांतील ही सलग दुसरी घटना आहे. वीस दिवसांपूर्वी याच ठिकाणी अशाच पद्धतीने रेल्वे थांबवून प्रवाशांना मारहाण करून लुटण्यात आले होते.

1 एप्रिल 2022 रोजी नंदीग्राम एक्स्प्रेस आणि नांदेड-मनमाड पॅसेंजर ट्रेन थांबवून प्रवाशांना लुटण्यात आले. यानंतर सुरक्षा वाढवण्यात आली. मात्र आज मध्यरात्री पुन्हा एकदा असा प्रकार घडल्याने रेल्वे प्रवाशांच्या सुरक्षेवर प्रश्नचिन्ह निर्माण झाले आहे. सध्या या संपूर्ण प्रकरणाचा पोलीस तपास सुरू आहे.

गुरूवारी देवगिरी एक्स्प्रेस औरंगाबाद स्थानकातून मुंबईच्या दिशेने निघाली होती. मध्यरात्रीनंतर काही वेळातच रात्री बारा ते एक वाजण्याच्या सुमारास पोटुल रेल्वे स्थानकाजवळील सिग्नलवर कापड बांधून गाडी थांबवण्यात आली. दरम्यान, रेल्वेवर दगडफेक सुरू झाली. अचानक घडलेल्या या प्रकारामुळे प्रवाशांना काहीच समजले नाही, त्यानंतर काही दरोडेखोरांनी ट्रेनमध्ये घुसून चाकूचा धाक दाखवून लुटमार सुरू केली. दरम्यान, काही दरोडेखोरांनी बाहेरून दगडफेक सुरूच ठेवली.

अचानक झालेल्या या हल्ल्यामुळे प्रवासी घाबरले. दरोडेखोरांनी विशेषतः S5 ते S9 बॉक्सला लक्ष्य केले. यादरम्यान उर्वरित डब्यातील प्रवाशांना ही बाब समजताच त्यांनी तात्काळ आपल्या डब्यांचे दरवाजे व खिडक्या बंद करून स्वत:चा बचाव केला. या प्रकरणी औरंगाबाद लोहमार्ग पोलीस ठाण्यात गुन्हा नोंदविण्यात आला आहे.