राज्यात दहावीच्या परीक्षा सुरु झाल्या आहे. दहावी आणि बारावीच्या परीक्षा कॉपीमुक्त घेण्याचे आदेश मुख्यमंत्री देवेंद्र फडणवीस यांनी दिले असून कॉपीमुक्त मोहीम सुरु केली. पण यवतमाळच्या महागाव तालुक्यातील कोठारी आणि महागावच्या परीक्षा केंद्रावर दहावीचा मराठीचा पेपर व्हॉट्सअॅपवर व्हायरल झाला.त्यामुळे दोन्ही परीक्षा केंद्रावर मुख्यमंत्र्यांच्या आदेशाचे उल्लंघन झाले.
शुक्रवारी महागाव तालुक्यातील परीक्षा केंद्रावर मराठीचा पेपरसुरु झाल्यानंतर काही मिनिटांतच परीक्षा केंद्राच्या बाहेर असलेल्या नागरिकांच्या व्हॉट्सअॅपवर मराठीचा पेपर व्हायरल झाला.
मुख्यमंत्र्यांनी फसवणूक करणाऱ्या विद्यार्थ्यांवर आणि फसवणूकीला प्रोत्साहन देणाऱ्यांवर फौजदारी कारवाईचे आदेश दिले आहेत, परीक्षा केंद्रात झालेल्या पेपरफुटीला महागाव शिक्षण विभागाचे गटशिक्षण अधिकारी, केंद्र संचालक आणि संस्था संचालक जबाबदार असल्याने त्यांच्यावर कारवाई होणार की नाही, असे प्रश्न उपस्थित केले जात आहेत.
महागाव शिक्षण विस्तार अधिकारी विजय बेटेवाड म्हणाले की, कोठारी विद्यालय परीक्षा केंद्रावर मराठीचा पेपर फुटणे ही गंभीर बाब आहे. म्हणूनच केंद्र चालकाविरुद्ध पोलिस ठाण्यात तक्रार दाखल करण्यात आली आहे.
