नागपुरमधील मिहानमध्ये टाटा समूहाकडून गुंतवणूक करण्याबाबत टाटा सन्सचे अध्यक्ष नटराज चंद्रशेखरन यांनी केंद्रीय मंत्री नितीन गडकरी यांना पत्र पाठवलं आहे. टाटा समूह मिहानमध्ये गुंतवणूक करण्यास उत्सुक असल्याचं चंद्रशेखरन यांनी पत्रातून सांगितलं आहे. नितीन गडकरींनी 7 ऑक्टोबर रोजी नटराज चंद्रशेखरन यांना पत्र पाठवून नागपुरातील मिहान सेझमध्ये गुंतवणुकीची मोठी संधी असल्याचे सांगितले होते. त्यामुळे गुंतवणुकीबाबत टाटा समूह पॉझिटिव्ह असल्याचे पत्र चंद्रशेखर यांनी लिहिलं आहे.
नटराज चंद्रशेखरन यांनी केंद्रीय मंत्री नितीन गडकरी यांना पाठवलेल्या पत्राबद्दल विदर्भ इकॉनॉमिक डेव्हलपमेंट कौन्सिलने समाधान व्यक्त केले आहे. नागपूरच्या मिहान एसईझेडमध्ये मोठ्या प्रमाणावर जमीन उपलब्ध आहे. तसेच टाटा समूहाचे अनेक प्रकारचे उद्योग आणि व्यापार आहेत. टाटा समूहाच्या बिग बास्केटसाठी नागपूरच्या मिहानमध्ये मोठे गोदाम निर्माण केले जाऊ शकतात. तसेच टाटा समूहाच्या ताज ग्रुप ऑफ हॉटेलसाठीही नागपूरच्या मिहानमध्ये वाव आहे, असे वेदचे उपाध्यक्ष प्रदीप माहेश्वरी यांनी म्हटले आहे.