नाशिकमध्ये मनसे स्वबळावर लढणार : संदीप देशपांडे

मनसे अध्यक्ष राज ठाकरे आणि भाजपचे प्रदेशाध्यक्ष चंद्रकांत पाटील यांची भेट झाल्यानंतर मनसे-भाजप युती होणार असल्याची जोरदार चर्चा होती.मात्र, त्याला पूर्णविराम मिळाला आहे.नाशिकमध्ये मनसे स्वबळावर लढणार आहे,अशी माहिती मनसेचे सरचिटणीस संदीप देशपांडे यांनी दिली आहे.

संदीप देशपांडे आणि मनसे नेते अमित ठाकरे हे नाशिकच्या दोन दिवसाच्या दौऱ्यावर आले आहेत.यावेळी संदीप देशपांडे यांनी मीडियाशी संवाद साधला.अमित ठाकरे यांच्या नेतृत्वात मनसे नाशिकमध्ये कमबॅक करेल. गेल्या पाच वर्षात नाशिककरांची पुरती निराशा झाली आहे.दत्तक घेऊ ही योजनाही फेल गेली आहे, असा टोला संदीप देशपांडे यांनी भाजपला लगावला.

नाशिकमध्ये मनसे स्वबळावरच लढणार आहे.सध्या तरी आमच्याकडे कुणाकडूनही युतीचा प्रस्ताव आलेला नाही, असं सांगतानाच राज ठाकरे यांनी नाशिकचं मनापासून संगोपन केलं आहे. जुन्या-नव्या कार्यकर्त्यांचा संगम घडवून पुन्हा एकदा आम्ही नाशिकमध्ये कमबॅक करणार आहोत,असं त्यांनी सांगितलं.